Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den Cxliij. Psalm.

1. Een ghebet om vergheuinghe der sonden: ende dewijle deselue hare vynanden heeft, noemlicken, den Satan, die tot vertwijffelinge drijft, ende leeraers, die op de Wet ende wercken wijsen: so biddet hy op Gods waerheyt ende gerechticheyt, verhoort te worden. Waerheyt is, dat God geloeft, hy wille de Godureesende verhooren: gherechticheyt, dat hy van onrechtueerdigen rechtueerdighe maecke, ende hen de sonden vergheeft om Christi wille.

A.1

Eenen Psalm Dauids. HEere verhoort mijn ghebet: ^a verneemt mijn smeecken om dyner waerheyt wille: verhoordt my om dyner gherechticheyt wille.

a Psalm. 102.a.2.

2

^b Ende en gaet niet int gherichte met dynen knechte: ^c want voor dy en is gheen leuendich mensche rechtueerdich.

b Exod. 34.a.7.

c Hiob. 4.b.17. ende 25.a.4. Psalm. 130.a.3. Eccles. 7.c.21. Nahum. 1.a.3. 4.Esdre. 8.d.35. 1.Ioan. 1.a.8.

3

Want de vyandt veruolcht mijn ziele, ende ^d† verslaet mijn leuen ter Aerden: hy leyt my int duyster, als de dooden inder werelt.

d† And. slaet ontwee.

4

Ende mynen gheest is in my geangstet: mijn herte is my in mynen lijue verteert.

5

^e Ick ghedencke aen de voorleden tijden: ick spreke van alle dyne daden, ende segghe van de wercken dyner handen.

e Psalm. 77.a.7.

6

^f Ick breyde myne handen wt tot dy: ^g mijn ziele dorstet na dy, als een dorre lant. Sela.

f Psalm. 63.a.2.

g Psalm. 42.a.3. ende 63.a.2.

7

Heere verhoort my in korten, mynen gheest vergaet: verbercht dijn aensicht niet van my, dat ick niet ghelijck en worde dien, die in de kuylen varen.

8

Laet my ^h vroech hooren dijn genade, ⁱ want ick hope op dy: doet my kondt den wech, daer ick op gaen sal, want my verlangt na dy.

h Dat is, haest ende by tijden, niet spade noch langsaem.

i Psalm. 25.a.1.

9

Verlost my mijn God van mynen vyanden: tot dy hebbe ick toeulucht.

B.10

Leert my doen na dynen welbehaghen, want du bist mijn God: dynen goeden Gheest, leyde my op effener bane.

11

Heere verquickt my om dijns Naems wille: leydt mijn ziele wt der noot, om dyner gherechticheyt wille.

12

Ende verstoort myne vyanden, om dyner goedertierenheyt wille, ende brengt om, alle die mijn ziele beangsten, ^k want ick ben dijn knecht.

k Sapien. 9.a.5. Psalm. 116.b.16.