Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den Cxlij. Psalm.

1. Wat deses Psalms inhoudt zy, leert den tijtel: ende wort bequamelicken ghebeden teghen de vyanden der Kercken, ende hare veruolghers.

1

Een onderwijsinghe Dauids te bidden, ^a doe hy in den kuyl was.

a 1.Sam. 24.a.4. Susan. g.62. Danie. 6.e.44.

2

ICk ^b schreye ten Heere met myner stemmen, ick smeecke den Heere met myner stemmen.

b Psalm. 77.a.2.

3

Ick schudde mijn reden voor hem wt, ende vertoone voor hem mynen noot.

4

Wanneer mynen gheest in angsten is, so ^c† neemstu dy myner aen: ^d sy legghen my stricken op den wech, daer ick op gae.

c† An. Bekenstu mynen wech.

d Psalm. 140.a.6. ende. 141.a.9. Ierem. 18.c.22. Syrach. 34.b.16.

5

Schouwet ter rechter hant, ende siet, daer en wil my niemandt kennen: ^e ick en kan niet ontulieden, niemant en neemt hem myner zielen aen.

e Ierem. 25.d.35.

6

Heere tot dy schreye ick, ende segghe: ^f Du bist mijn toeuersicht: ^g mijn deel, inden lande der leuendighen.

f Psalm. 18.a.9.

g Psalm. 16.a.6. ende 73.c.26. Treno. 3.c.24.

7

Merckt op mijn klaghe, want ick worde seer gheplaecht: verlost my van mynen veruolgers, want sy zijn my te machtich.

8

Voert mijn ziele wt den ^h kercker, dat ick dancke dynen Name: de rechtueerdige sullen hen tot my vergaderen, wanneer du my wel doest.

h Dat is, wt der noodt ende angst, daer ick in geuanghen ben.