Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den Cxlvj. Psalm.

Is gelijcken inhoudts met den voorgaenden Psalm: want hy vertelt Gods goedertierenheyt, dat hy aller dinghen schepper zy, dat hy syne gheloften houdet, ons bystaet, beschermt, verlosset, de sonden vergheeft, den ellendigen ende verlatenen helpt, etc. Ende heeft een schoon teghensette, vertrouwens op menschen ende op sodanighen God, dat ghenes, gantsch onnutte ende vergheefs, maer dit ghewisse ende onbedrieghelick zy.

A.1

Haleluya. ⁺ LOeft ^a den Heere mijn ziele.

+ Die op menschen hoept, dien feylen syne aenslagen, ende is vergeefs. Psalm. 118.a.

a Psalm. 103.a.1. ende 104.a.1.d.35.

2

Ick wil den Heere louen, so langhe als ^b ick leue, ende mynen Gode lofsinghen, dewijle ick hier ben.

b Psalm. 104.d.33

3

Verlatet v niet op de Vorsten: ^c† sy zijn menschen, die en konnen ymmers niet helpen.

c† An. Ia op geenen mensche

4

Want des menschen gheest moet daer van, ende hy moet weder tot Aerde worden: als dan zijn verloren alle zijn aenslaghen.

5

Wel dien, welckers hulpe de God Iacobs is, welckers hope op den Heere synen God staet.

6

^d Die Hemel, Aerde, Zee, ende alles wat daerinne is, gemaect heeft: die ghelooue houdt eewichlick.

d Act. 14.b.15. Psalm. 115.b.15. ende 124.a.8. Apoca. 14.a.7.

7

Die recht doet dien, die ghewelt lijden, die ^e de hongherighe spijst: de Heere verlost de gheuanghenen.

e Bel b.12.

8

^f De Heere maeckt de blinden siende, ^g de Heere richtet op, die nedergheslaghen zijn, de Heere heeft lief de rechtueerdighe.

f 2.Para. 33.b.13.

g Tob. 11.b.15. Ioan. 9.a.7.

9

^h De Heere bewaert de vreemdelinghen ende weesen, ⁱ ende behoudt de weduwen, ende keert te rugghe den wech der Godloosen. ⁺

h Deute. 10.b.18. Psalm. 68.a.6.

i Prou. 15.c.25.

+ Hy drijft het wederspel met hen.

10

De Heere is Koninck eewichlick: dijn God Zion, voort ende voort. Haleluya.