Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den Cxxxix. Psalm.

1. In het voorgaende deel deses Psalms is een dancsegghinghe, voor de scheppinghe, ende wonderlicke regeringhe der Heyligen, die in Gods handen, buyten onse krachten, ghedachten ende raedtslaghen gantsch bestaet. 19. Het ander deel veruatet een ghebet, dat de vyanden des woorts, die wt vertrouwen eyghener kracht allerley moetwil ende stoutheyt plegen, omkomen, ende hy in Gods woordt behouden worde.

A.1

Eenen Psalm Dauids voor te singhen. HEere, du doorgrondest, ^a ende kenst my.

a Psalm. 33.b.15.

2

Ick sitte ofte sta op, so weetstu het: ^b du verstaest myne ghedachten van verre.

b Iob. 42.a.1. Syrach. 43.a.4.

3

^c Ick ga ofte ligghe, so bistu om my, ende siest alle myne weghen.

c Prouer. 20.c.24 Ierem. 10.c.23.

4

Want siet, daer en is gheen woort op myner tonghen, dat du Heere niet alles en wetest.

5

Du ^d† beschickest het, wat ick voor ofte na doe, ende houdest dyne hant ouer my.

d† An. staltest my achter ende voor

6

Sulcke bekentenisse is my te wonderlick ende te hoogh: ick en kan het niet begrijpen.

7

^e Waer sal ick henen gaen voor dynen Gheeste? ende waer sal ick henen vlieden, voor dynen aengesichte?

e Sapien. 16.b.15. Iob. 13.a.2.

8

^f Voer ick inden Hemel, so bistu daer: beddede ick my inder Hellen, siet, so bistu oock daer.

f Amos 9.a.2. Ierem. 23.c.23.

9

Name ick vleughelen des dagheraedts, ende bleue in de wterste Zee:

B.10

So soude my doch dyne handt aldaer leyden, ende dyne rechterhant my houden.

11

Sprack ick: Duysternissen moghen my bedecken: so moet den nacht, oock licht om my zijn.

12

Want oock de duysternisse en is niet duyster by dy, ende den nacht lichtet als den dach: duysternisse is als het licht.

13

^g Want du hebst myne nieren in dyner ghewelt: du warest ouer my in moeders lijue.

g Ierem. 17.b.10.

14

Ick dancke dy daer voor, dat ick wonderbaerlick ghemaeckt ben: ^h wonderbaerlick zijn dyne wercken, ende dat bekent mijn ziele wel.

h Apocal. 15.a.3.

15

Mijn ghebeente en was dy niet verborghen, doe ick int verborghen ghemaeckt wert: doe ick ghebeeldet wert ⁱ onder in der Aerden.

i Dat is, diep in moeders lijue.

16

^k Dyne ooghen saghen my, doe ick noch onbereydet was: ende alle ^{l †} daghen waren in dynen boeck geschreuen, die noch worden souden, ende derseluer noch gheen daer en was.

k Ierem. 1.a.5.

l Dat is, Hoe lange ick leuen soude, dat wistestu, eer ick begost te leuen.

† And. [myne leden] waren als in dynen boeck gheschreuen, hoewel sy langhe daer na gestaltet werden, ende etc.

17

Doch hoe kostelick zijn voor my, God dyne ghedachten? hoe is harer so een groote somme?

18

Soude ickse tellen, so soude harer meer zijn dan des zandts: wanneer ick opwake, ben ick noch by dy.

19

Och God, dat du doodedest de Godloosen, ende de bloedtghierighen van my wijcken moesten.

C.20

Want sy spreken van dy lasterlick, ende dyne vyanden verheffen hen sonder oorsake.

21

Ick hate doch Heere die dy haten, ende het verdriet my op haer, dat sy hen teghen dy setten.

22

Ick haetse in rechten ernste: daerom zijn sy my vyant.

23

^m Doorsoeckt my God, ende onderuint mijn herte: proeft my ende onderuindt, hoe ick het meyne.

m Psalm. 26.a.2.

24

Ende siet, oft ick op boosen weghe ben: ende leydt my op den eewighen wech.