Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den Cxl. Psalm.

1. Een ghebet teghen de vyanden der Kercken, die niet alleen schadich en zijn in dien, dat sy de heylsame leere menigherleywijse verhinderen, maer oock met tyrannie ende ghewelt, die sy met heftiger woedicheyt aenrichten. Biddet derhaluen, dat de Godureesende behouden worden, ende de Godloosen door haer eyghene aenslaghen omkomen. Alsmen sulcx ghemeynlick siet: want de Heere is Richter op Aerden.

A.1

Eenen Psalm Dauids voor te singhen.

2

VErlost my Heere vanden quaden menschen, behoedt my vanden ^a wreuelen lieden.

a of, stoute, moetwillige, geweltdadighe

3

Die boosheyt dencken in haren herten, ende daghelicx krijch aenrichten.

4

^b Sy scherpen hare tonghen, als een slanghe: aderen verghift is onder haren lippen. Sela.

b Psalm. 10.a.7. ende 14.a.3. Roma. 3.b.14.

5

Bewaert my Heere voor der hant der Godloosen, behoedt my voor den wreuelen lieden, die mynen ganck dencken om te stooten.

6

De hooueerdighe ^c legghen my stricken, ende breyden my zeelen wt, ten nette, ende stellen my vallen aenden wech. Sela.

c Psalm. 35.a.7. 141.a.9. Ierem. 18.c.22.

7

Ick daerenteghen segghe ten Heere: Du bist mijn God, Heere verneemt de stemme mijns smeeckens.

8

Heere Heere mijn stercke hulpe: du beschermest mijn hooft ter tijt des strijdts.

9

Heere, laet den Godloosen zijn begheeren niet: sterckt synen moetwille niet: sy mochten hen des verheffen. Sela.

B.10

^d Het ongheluck daer van myne vyanden raedtslaghen, ^e moet op haren kop vallen.

d Psalm. 7.b.17.

e Ecclesias. 10.a.4. Prouerb. 26.c.27. Syrach. 28.a.2. 1.Hester. 7.b.10.

11

Hy sal stralen ouer haer schudden, hy salse met vyere diep in de Aerde slaen, dat sy nemmermeer niet op en staen.

12

Eenen boosen mont en sal gheen gheluck hebben op Aerden: ⁺ een wreuelich boos mensche, sal veriaecht ende ghestortet worden.

+ Blixem ende donder slase in de Aerde: als in de roode Zee.

13

^f Want ick weet, dat de Heere sal des ellendighen sake, ende des armen recht, wtuoeren.

f Psalm. 10.b.18.

14

Oock sullen de rechtueerdighe dynen Name dancken, ende de vromen sullen voor dijn aenghesichte blijuen.