Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den Cxxxvij. Psalm.

1. Uoor aen is een klage ouer de Babylonische gheuanckenisse, ende ouermoedighe verhooninge der Heydenen, 5. daer na is een troostinghe, dat deselue gheuanckenisse eynden, ende de vyanden Israels grousamelicken ghestraft worden sullen.

A.1

AEn ^a de wateren te Babel saten wy, ende weenden, wanneer wy aen Zion ghedachten.

a Aent eynde der Koninghen, ende aent eynde der Chronijcken. Hesek. 1.a.1. ende 3.b.15.

2

Onse harpen hinghen wy aen de wilghen, die daer inne zijn.

3

Want aldaer hieten ons singhen, die ons gheuanghen hielden, ende in onsen huylen, vrolick zijn: lieuer, singhet ons een liedt van Zion.

4

^b Hoe souden wy des Heeren liedt singen in vreemden landen?

b Matth. 7.a.6.

5

Verghete ick dyner Ierusalem: so worde myner rechter hant vergheten.

6

Mijn tonghe moet aen mynen ^c gaghel kleuen, so ick dyner niet en ghedencke: so ick niet en late Ierusalem mijn hoochste vreuchde zijn.

c Of, raken

7

^d Heere, ghedenckt der kinderen Edom aen den daghe Ierusalem: die daer seggen: Reyn af, reyn af, tot op haren bodem.

d Iere. 49.c.20. Hesek. 25.b.12. Obad. a.1.

8

Du verstoorde dochter Babel: wel dien die dy vergheldet, als du ons ghedaen hebst.

9

^e Wel dien, die dyne ionghe kinderen neemt, ende ^f† vergruystse aenden steen.

e Iesa. 13.b.16. Iere. 50.a.1. 51.a.1

f† And. versmettert of, verplettert.