Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den Cxxxvj. Psalm.

1. Een dancksegghinghe gelijcken inhoudts met den vorighen Psalm: want hy vertelt de weldaden Gods in der scheppinghe, ende die hy sonderlinghen den volcke Israels bewesen heeft, ende vermaentse also tot dancsegghinghe.

A.1

DAncket ^a den Heere, want hy is vriendelick, want syne goedertierenheydt duert eewichlick.

a Psalm. 105.a.1. ende 106.a.1. ende 107.a.1.

2

Dancket den ^b Gode aller Goden, want syne goedertierenheyt duert eewichlick.

b Deute. 10.b.17. Dani. 2.e.47. ende 12.a.1.

3

Dancket den Heere aller heeren, want syne goedertiereheyt duert eewichlick.

4

^c Die groote wonderen doet alleene, want syne goedertierenheyt duert eewichlick.

c Iudic. 13.b.19. Iosue. 22.c.22. Psalm. 72.b.18.

5

^d Die de Hemelen ^{e †} ordentlick ghemaeckt heeft, want syne goedertierenheydt duert eewichlick.

d Gene. 1.a.1. Iesa. 40.c.22.

e Dat den Hemelen ende sterren sodanen gewissen loop hebben, ende niet feylen.

† And. met vernuft

6

^f Die de Aerde op het water wtghebreydet heeft, want syne goedertierenheyt duert eewichlick.

f Hiob. 38.a.6. Gene. 1.a.6. Psalm. 24.a.2. Ierem. 10.b.12. ende 51.b.15.

7

^g Die groote lichten ghemaeckt heeft, want syne goedertierenheyt duert eewichlick.

g Gene. 1.b.14.

8

De Sonne den daghe voor te staen, want syne goedertierenheyt duert eewichlick.

9

De Maen ende de Sterren, der nacht voor te staen, want syne goedertierenheyt duert eewichlick.

B.10

^h Die Egypten sloech aen haren eerstegheboorten, want syne goedertierenheydt duert eewichlick.

h Exad. 12.c.29.

11

ⁱ Ende leydde Israel wt, want syne goedertierenheyt duert eewichlick.

i Exod. 12.d.37. ende. 13.b.17.

12

Door een machtighe handt, ende wtghereckten arme, want syne goedertierenheydt duert eewichlick.

13

^k Die de ^l† Schelfzee deylde in twee deelen, want syne goedertierenheyt duert eewichlick.

k Exod. 14.c.21. Psalm. 78.b.13.

l† And. Rietzee, Roode zee.

14

Ende liet Israel daer door gaen, want syne goedertierenheyt duert eewichlick.

15

^m Die Pharao ende zijn heyr in de Schelfzee stiet, want syne goedertierenheyt duert eewichlick.

m Exod. 14.c.28.

16

ⁿ Die zijn volck leydde door de woestijne, want syne goedertierenheyt duert eewichlick.

n Exod. 15. 16. 17. Psalm. 78.f.53. ende 106.b.11.

17

Die groote Koningen sloech, want syne goedertierenheyt duert eewichlick.

18

^o Ende verworchde machtighe Koninghen, want syne goedertierenheyt duert eewichlick.

o Nu. 21 c.24.d.35. Iosue. 12.a.1. 4.Esdr. 1.b.10.

19

^p Sihon der Amoriten Koninck, want syne goedertierenheyt duert eewichlick.

p Nume. 21.c.24.

C.20

Ende ^q Og den Koninck te Basan, want syne goedertierenheyt duert eewichlick.

q Nume. 21.d.33. Deut. 3.a.1.

21

^r Ende gaf haer lant ten erue, want syne goedertierenheyt duert eewichlick.

r Iosu. 12.a.6. ende 13.a.7.

22

Ten erue synen knechte Israel, want syne goedertierenheyt duert eewichlick.

23

^s Want hy dachte aen ons, doe wy onderdruckt waren, want syne goedertierenheyt duert eewichlick.

s Iudic. 2. 3. 4. etc.

24

Ende verlossede ons van onsen vyanden, want syne goedertierenheyt duert eewichlick.

25

^t Die allen vleesche spijse gheeft, want syne goedertierenheyt duert eewichlick.

t Psalm. 104.c.27 ende 145.b.15.

26

^u Dancket den Gode vanden Hemel, want syne goedertierenheyt duert eewichlick.

u Tob. 12.a.8.