Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den Cxxxv. Psalm.

1. Is by na ghelijcken inhoudts met den voorleden, behaluen dat hier de oorsaken toegesettet worden, waer om men den Heere prediken ende louen sal. Want hy vertelt niet alleene gemeyne wonderwercken, 8. maer

[fol. 201r]

oock bysonderighe, ende die desen volcke eyghen zijn, Dat hy zijn Rijcke ende dienst hebbe in Iacob: dat hy zijn volck verlost hebbe in Egypten: dat hy hen het lant Canaan ghegheuen hebbe, etc.

A.1

^a† Haleluya. LOeft ^b den Name des Heeren: loeft ghy knechten den Heere.

a† And. Loeft den Heere.

b Psalm. 113.a.1. ende. 134.a.1.

2

Die ghy staet inden huyse des Heeren, in de houen des huys ons Gods.

3

Loeft den Heere, ^c want de Heere is vriendelick: lofsinghet synen Name, want hy is lieffelick.

c Psal. 34.a.9. ende 118.a.1. ende 136.a.1.

4

^d Want de Heere heeft hem Iacob verkoren, Israel tot synen ^e eyghendomme.

d Deute. 4.c.20.d.37. ende 10.b.15. 4.Esdr. 6.f.54.

e Exod. 19.a.5. 1.Pet. 2.a.9.

5

Want ick weet, dat de Heere groot is, ende onse Heere voor alle Goden.

6

^f Alles wat hy wil, dat doet hy, inden Hemel, op Aerden, in de Zee, ende in allen diepten.

f 1.Sam. 3.b.18.

7

^g Die de wolcken laet opgaen vanden eynde der Aerden: die den blixem ^h† met tsamen den reghen maeckt: die den wint wt heymelicke plaetsen komen laet.

g Ierem. 10.b.13. ende 51.b.16.

h† And. onder

8

ⁱ Die de eerstegheboorte sloech in Egypten, beyde der menschen ende des vee.

i Exod. 12.c.29. Psalm. 78.f.51. ende 136.b.10.

9

^k Ende liet syne teeckenen ende wonderen komen ouer dy Egyptenlandt: ouer Pharao, ende ouer alle syne knechten.

k Exod. 7. 8. 9. 10.

B.10

^l Die vele volcken sloech, ^m ende doodde machtighe Koninghen.

l Nu. 21.c.24.d.35 Deute. 2.d.32. ende 3.a.3.

m Iosue. 12.a.1.

11

ⁿ Sihon der Amoriten Koninck, ende Og den Koninck te Basan, ende alle Koninckrijcken in Canaan.

n Deute. 3.a.1. Num. 21 c 24.d.33.

12

^o Ende gaf haer lant ten erue, ten erue synen volcke Israel.

o Iosu. 12.a.6. ende. 13.a.7.

13

Heere, dynen Name duert eewichlick: dyne ghedachtenisse Heere duert voort ende voort.

14

^p Want de Heere sal zijn volck richten, ende synen knechten ghenadich zijn.

p Detue. 32.d.36. 2.Machab. 7.a.6.

15

^q Der Heydenen Afgoden zijn siluer ende gout, van menschen handen ghemaeckt.

q Psalm. 115.a.4. Iesa. 44.a.9. ende. 46.a.4. Ierem. 10.a.3. Sapien 13.b.15. Apocal. 9.c.20.

16

Sy hebben mont ende en spreken niet, sy hebben ooghen ende en sien niet.

17

Sy hebben ooren ende en hooren niet, oock en is gheenen adem in haren monde.

18

^r Die sulcke maken, zijn ghelijck also: alle die op sulcke hopen.

r Psalm. 115.a.8.

19

Het huys Israels loue den Heere: loeft den Heere ghy vanden huyse Aaron.

C.20

Ghy vanden huyse Leui loeft den Heere, ghy die den Heere vreest, loeft den Heere.

21

Gheloeft zy de Heere wt Zion, die te Ierusalem woont. Haleluya.