Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den Cxxvj. Psalm.

1. Een dancksegghinge met eener toesegghinghe der verlossinghe wt der gheuanckenisse, daer het volck Israels in Babylonien onder gheweest is, ende wt den cruyce, daer de Kercke tot allen tijden in deser werelt mede beangstet wort.

A.1

Een liedt inden hooghen Choor. VVanneer de Heere de gheuanghenen Zion verlossen sal, so sullen wy zijn als de ^a droomende.

a Dat is, De vreuchde sal so groot zijn, dat wyse nauwe geloouen sullen, ende sal ons zijn, ghelijck als droomde het ons, ende en ware niet waer.

2

Dan sal onsen mont vol lachens, ende onse tonghe vol roems zijn: dan salmen segghen onder de Heydenen: De Heere heeft groot by hen ghedaen.

3

De Heere heeft groot by ons ghedaen, dies zijn wy vrolick

4

Heere wendt onse gheuanckenisse: als ^b† du de wateren int ^c Suyden ghedroocht hebst.

b† And. als de beken int, etc.

c Dat is, daer hy de roode Zee drooghe maeckte.

5

^d Die met tranen saeyen, sullen met vreuchden maeyen.

d Gala. 6.a.8.

6

^e Sy gaen henen ende weenen, ende draghen edel zaet: ende komen met vreuchden, ende brenghen hare garuen.

e Iesa. 33.a.7.