Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den Cxxiiij. Psalm.

1. Een lieffelicke troostinghe der Kercken in haren cruyce, 6. met eener dancksegghinge voor het trouwe bystant, dat haer God doet, teghen des Satans ende der werelt woeden, dat hier de Prophete seer fijn afmaelt.

A.1

Een liedt Dauids inden hooghen Choor. SO de Heere niet by ons en ware: so segge Israel.

2

So de Heere niet by ons en ware, wanneer de menschen hen teghen ons setten.

3

^a So verslonden sy ons leuendich, wanneer haren toorne ouer ons vergrimde.

a Prouer. 1.b.12.

4

^b So versope ons water: stroomen ghinghen ouer onse zielen.

b Iesa. 8.a.7.

5

^c De wateren ghinghen al te hooch, ouer onse zielen.

c Psalm. 69.a.1. Ione. 2.a.5.

6

Gheloeft zy de Heere, dat hy ons niet en gheeft ten rooue in haren tanden.

7

Onse ziele is ontkomen, als een voghel den stricke des voghelvanghers: het strick is verscheurt, end wy zijn los.

8

^d Onse hulpe staet inden Name des Heeren, die Hemel ende Aerde ghemaeckt heeft.

d Psalm. 3.a.9. ende. 21.a.2.