Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

[fol. 197r]

Den Cviij. Psalm.

1. Een dancksegghinghe, daer hy God in danct, voor het Rijcke Christi, dat een Rijcke der genade zijn soude, ende oock voor zijn eygen lijffelick Rijck, dat als een settgroeue zijn soude des koemstighen Rijcx Christi: want het Heyl koemt vanden Ioden. Ende dit ander deel deses Psalms staet met euen ghelijcken woorden inden lx. Psalm.

A.1

Een Psalm liedt Dauids.

2

GOd, ^a het is mijn rechte ernst: ick wil singhen ende dichten, mijn ^b eere oock.

a Psalm. 57.a.8.

b Dat is, mijn snarenspel, daer ick dy mede eere.

3

Wel op Psalter ende harpe: ick wil vroech op zijn.

4

Ick wil dy dancken Heere onder de volcken, ick wil dy lofsinghen onder de lieden.

5

^c Want dijn ghenade reyckt so wijdt als den Hemel is, ende dyne waerheydt so wijdt als de wolcken gaen.

c Psalm. 103.b.11.

6

Verheft dy God ouer den Hemel, ende dyne eere ouer alle landen.

7

Op dat dyne lieue vrienden verlost worden: helpt met dyner rechterhant, ende verhoort my.

8

^d God spreeckt in zijn Heylichdom, dies ben ick vrolick: ende wil Sichem deylen, ende het dal Suchoth afmeten.

d Psalm. 60.a.8.

9

Gilead is myne, Manasse is oock myne, ende Ephraim is de macht mijns hoofts, Iuda is mijn ^e† Vorst.

e† An. Wetgeuer Gene. 49.b.10.

B.10

Moab is mijnen waschpot: ick wil mynen schoen ouer Edom strecken, ouer de Philisteen wil ick iuychen.

11

Wie wil my voeren in een vaste stadt? wie sal my leyden in Edom?

12

Saltu het niet doen God, die du ons verstootst? ende en treckst niet wt God met onsen heyre?

13

^f Doet ons bystant inder noot: want menschen hulpe is gheen nutte.

f Psalm. 60.b.15.

14

Met God willen wy daden doen, hy sal onse vyanden ondertreden.