Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den Cvij. Psalm.

1. Gelijck als in den tween vorleden Psalmen, God eyghentlicken ghedancket wert, voor de weldaden, den volcke Israels bewesen, also werden hier veruatet allerley weldaden, daer God den nootdurftighen, gheuanghenen, krancken, dien die daer zijn in vare des Zees, in hongher, in dierte, ende van Tyrannen gheplaecht werden etc. mede helpet: ende is derhaluen een ghemeyne dancksegginghe. Ende merckt dat hy duydtlicken seyt, dat oock dien van Gode gheholpen wert, die om harer sonden wille ghestraft, God mit vertrouwen om hulpe bidden.

A.1

DAncket den Heere, ⁺ want hy is vriendtlick, ende syne goedertierenheyt duert eewichlick.

+ Desen Psalm is eenen gemeynen danc, hoe God allerley menschen wt allerley noot helpt: Gelijck Paulus seyt, 1.Tim. 2. Hy is een Heylandt aller menschen.

2

Segghet, ghy die verlost zijt door den Heere, die hy wt der noodt verlost heeft.

3

Ende die hy wt den landen te samen ghebracht heeft, van Oosten, van Westen, van Noorden, ende van der Zee.

4

Die dolende ghinghen in der woestijne in eenen onghebaenden wech, ^{+ +} ende vonden gheene stadt, daer sy woonen konden,

+ I.

+ De eerste zijn, die arm ende ellendich zijn, noch huys noch hof hebben, ende niets weten te beghinnen.

5

Hongherich ende dorstich, ende hare ziele versmachtede.

6

Ende sy riepen tot den Heere in harer noodt, ende hy verlostese wt haren angsten.

7

Ende leyddese in eenen rechtighen wech, dat sy ghinghen tot der stadt, daer sy woonen konden.

8

Die sullen den Heere dancken voor syne goedertierenheyt, ende voor syne wonderen, die hy aen den menschen kinderen doet.

9

^a Dat hy versadicht de dorstighe ziele, ende vullet de hongherighe ziele met goede.

a Exod. 16.b.13. Deut. 8.a.3. Psalm. 78.c.14. ende 105.e.40.

B.10

Die daer sitten moesten in der duysternisse ende donckeren, ^{+ +} gheuanghen in dwanghe ende ijseren.

+ II.

+ De andere zijn, die met gheuanckenisse om harer misdaet wille geplaecht, ende door Gods hulpe verlost werden. 2.Para. 33.b.11.

11

Daerom dat sy Gods ^b† geboden onghehoorsaem gheweest waren, ende de Wet des Hoochsten gheschendet hadden.

b† An. worden etc. ende den raet des etc. verlastert hadden.

12

Daerom moeste haer herte met ongheluck gheplaecht worden, dat sy daer lagen, ende niemandt halp hen.

13

Ende sy riepen tot den Heere in harer noodt: hy halp hen wt haren angsten.

14

Ende voerdese wt der duysternisse ende donckerheyt, ende verschuerde hare banden.

15

Die sullen den Heere dancken voor syne goedertierenheyt, ende voor syne wonderen, die hy aen den menschen kinderen doet.

16

Dat hy in stucken breect metalen deuren, ende slaet ontwee ijsere grendelen.

17

De sotten die gheplaecht waren om harer ouertredinghe wille, ^{+ +} ende om harer sonden wille.

+ III.

+ De derde zijn sotten, die God niet vreesen, ende in sonden leuen, die worden geplaecht: ende ghenesen doch sommighe, dat sy niet en steruen.

18

Dat hen walchde voor alle spijse, ende werden doodt kranck.

19

Ende sy riepen tot den Heere in harer noodt, ende hy halp hen wt haren angsten.

C.20

^c Hy sandt zijn woordt, ende maecktese ghesondt, ende verlostese, dat sy niet en storuen.

c Num. 21.a.9. Iesa. 38.a.9. Matth. 8.b.13.

21

Die sullen den Heere dancken voor syne goedertierenheyt, ende voor syne wonderen, die hy aen den menschen kinderen doet.

22

^d Ende danck offeren, ende vertellen syne wercken met vreuchden.

d Hebre. 13.b.15. 1.Pet. 2.a.5.

23

Die met schepen op de Zee varen, ende drijuen haren handel in grooten wateren. ^{+ +}

+ IIII.

+ De vierde zijn, die op der Zee noodt lijden, ende gheberget of geholpen worden.

24

Die des Heeren werck ondersocht hebben, ende syne wonderen in der Zee.

25

^e Wanneer hy sprack, ende eenen stormwindt oproerde, die de baren verhief.

e Ioan. 1.a.4. Act. 27.b.10.

26

Ende sy voeren op na den Hemel, ende voeren in den afgrondt, dat hare ziele voor angst vertzaechde.

27

Dat sy tuymelden ende swanckten, als een droncken man, ende wisten ghenen raedt meer.

38[28]

^f Ende sy riepen tot den Heere in harer noodt, ende hy voerdese wt haren angsten.

f Ionas. 1.b.14.

29

^g Ende stilde het onweder, dat de baren hen legherden.

g Matth. 8.c.26. Psalm, 8.c.26.

D.30

Ende sy worden vrolic, dat het stille gheworden was, ^h ende hy hen te lande brachte, na haer wenschen.

h Ioan. 6.c.20.

31

Die ⁱ sullen den Heere dancken voor syne goedertierenheyt, ende voor syne wonderen, die hy aen den menschen kinderen doet.

i Psalm. 107.a.8.

32

Ende hem in der Gemeynte prijsen, ende by den ouderen roemen.

33

Die, welcker hare beke verdrooghet, ^{+ +} ende de waterspronghen verloopen waren,

+ V.

+ De vijfte zijn, die met onuruchtbaren weder gheplaecht worden, ende wederom reghen ende vrucht krijghen. 1.Reg. 17.a.1. Iesa. 41.b.17.

34

Dat een vruthtbaer landt niets droech, om der boosheyt wille, dier, die daerin woonden.

35

Ende hy ^k dat drooghe landt wederom waterrijck maeckte, ende in dorren lande waterspronghen.

k 1.Reg. 18.e.41. Iesa. 41.b.18. ende 43.b.19.

36

Ende de hongherighen daer henen ghesettet heeft, dat sy eene stadt bereydeden, daer sy woonen konden.

37

Ende acker besaeyen, ende wijnbergen planten mochten, ende de iaerlicke vruchten kreghen.

38

Ende hyse seghende, dat sy hen seer vermeerderden, ende ^l hen veel vees gaf.

l Gen. 31.a.7.

39

Die, ^{+ +} welcke nederghedruckt ende gheswackt waren, van den boosen, diese ghedwonghen ende ghedronghen hadden.

+ VI.

+ De seste zijn, die met Tyrannen ofte oproer gheplaecht worden, ende wederomme vrede ende eenicheyt krijghen.

E.40

Doe verachtinghe op de Vorsten gheschuddet was, dat alle landt dwalende ende woeste stont.

41

Ende hy den armen beschuttede voor ellende, ende zijn gheslachte, als een kudde schapen vermeerderde.

42

^m Sulcken sullen de vromen sien, ende hen verheughen, ende aller boosheyt sal den mondt ghestoppet worden.

m Iob. 22.b.19.

43

Wie is wijs, ende ⁿ behoudt dit? so sullen sy mercken, hoe vele weldaden de Heere betoont.

n Dat is, Daeraen ghedencket ende daer met om gaet.