Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den Cix. Psalm.

1. Een gebet Christi, daer hy synen vyanden den Ioden alle ongheluck in toewenscht, ende God om bystant biddet. Oorsake deser syner toewenschinge teeckent hy aen, dat sy Christum ghecruyst, ende zijn heylsaem woort, door de Apostelen ghepredickt, niet ghewilt en hebben.

A.1

Eenen Psalm Dauids voor te singhen. GOd mynen roem, en swijcht niet.

2

Want sy hebben haren Godloosen ende valschen mont teghen my op ghedaen, ende spreken teghen my met valscher tonghen.

3

Ende sy spreken verghiftich teghen my ouer al, ende strijden teghen my sonder oorsake.

4

^a† Daer voor dat ickse lief hebbe, zijn sy tegen my, ick daerenteghen bidde.

a† Psalm. 35.b.12.

5

Sy bewijsen my quaet voor goet, ende haet voor liefde.

6

^b Settet Godloose ouer hem, ^c ende den Sathan moet staen te syner rechterhant.

b Dat is, Haer leere, leuen, leeren ende bidden, moet al verdoemt zijn. Leuit. 26.b.15. Deute. 28.b.15.

c Sacha. 3.a.1.

7

^d† Wie hem denseluen leeren laet, diens leuen moet Godloos zijn, ende zijn ghebet moet sonde zijn.

d† And. So hy voor tgerichte gestelt wert, werde hy veroordeelt, ende zijn bede werde hem ter sonde.

8

Syner dagen moeten weynich worden, ^e ende zijn ampt moet een ander ontfanghen.

e Ioan. 17.b.12. Act. 1.c.20.

9

Syne kinderen moeten weesen worden, ende zijn wijf een weduwe.

B.10

Syne kinderen moeten verdwaelt ende verbijstert gaen, ende bedelen, ende soecken, als die verdoruen zijn.

11

De woeckenaers moeten wtsuyghen alles wat hy heeft, ende vreemde moeten syne goederen roouen.

12

Ende niemant en moet hem weldaet bewijsen, ende niemant en ontferme hem syner weesen.

13

Syne nakomelinghen moeten wtgheroeyt worden: haren naem moet int anderde lidt verdelcht worden.

14

Syner vaderen misdaet moet gedacht worden voor den Heere, ende syner moeder sonde en moet niet wtghedelcht worden.

15

De Heere moetse nemmermeer wt den ooghen laten, ende hare ghedachtenisse moet wtgeroeyt worden op Aerden.

16

Daerom dat hy so gantsch gheen barmherticheyt hadde, ^f maer veruolchde den ellendigen ende armen, ende den bedroefden, dat hy hen doodde.

f Psalm. 10.a.8. ende. 37.b.12.d.32. Exod. 23.a.7. Iesaie 3.b.14.

17

Ende hy woude den ^g vloeck hebben, die sal hem oock komen: hy en woude den seghen niet, so sal hy oock verre van hem blijuen.

g Psal. 100.a.7. Syrach. 23.a.9. ende 27.b.17.

18

Ende hy tooch aen den vloeck, als zijn hemde, ende is in zijn inwendighe ghegaen als water, ende als olye in syne beenen.

19

So worde hy hem als een kleedt, dat hy aen hebbe, ende als eenen gordel, daer hy hem altijt mede gorde.

C.20

Also gheschiede dien vanden Heere, die my teghen zijn, ende spreken quaet teghen mijn ziele.

21

Doch du Heere, Heere, zy du met my, om dijns Naems wille, want dijn ghenade is mynen troost, verlost my.

22

^h Want ick ben arm ende ellendich, mijn herte is ^i† verslaghen in my.

h Psalm. 86.a.1.

i† And. ontwee

23

^k Ick vare wech als een schaduwe die verdreuen wort, ende worde veriaecht, als de sprinckhanen.

k Psal. 102.b.12. ende. 144.a.4. 1.Paral. 30.b.15.

24

Myne knyen zijn swack van vasten: ende mijn vleesch is magher, ende en heeft gheen vette.

25

Ende ick moet haren spot zijn: ^l wanneer sy my sien, schudden sy haren kop.

l Psalm. 22.a.8.

26

Staet my by, Heere mijn God: helpt my na dyner ghenade.

27

Dat sy beuinden, dat dit zy dyne handt: dat du Heere sulcks doest.

28

Vloecken sy, so seghene du: setten sy hen teghen my, so moeten sy te schanden worden, doch dijn knecht moet hem verheughen.

29

Myne teghenpartijders moeten met smaetheydt aenghetoghen worden, ende met harer schande bekleedet worden, als met eenen rock.

D.30

Ick wil den Heere seer dancken met mynen monde, ende hem roemen onder velen

31

^m Want hy staet den armen ter rechter hant, dat hy hem helpe van dien, die zijn leuen veroordelen.

m Psalm. 16.a.8. Prouerb. 3.c.25.