Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den Ciij. Psalm.

1. Eenen sonderlingen Psalm, daer hy God in danck segghet, voor allerley gheestelicke ende lijflicke weldaden, dat hy de sonden vergheeft, het leuen behoudet, troostet, beschermet, predicken laet, ghenade aenbiedet etc. Aen het eynde is een Prophecie van het Rijcke Christi ende den nieuwen Testamente, dat dit alles opentlicken ouer de gantsche wereldt, door de Apostelen ghepredict worden soude.

A.1

Eenen Psalm Dauids. LOeft ^a den Heere mijn ziele, ende alles wat in my is, synen Heylighen Name.

a Psalm. 104.a.1. d.35. ende 146.a.1. Tobi. 13.b.19.

2

Loeft den Heere mijn ziele, ende vergheet niet, wat hy my goets ghedaen heeft.

3

^b Die dy alle dyne sonden vergeeft, ende heelet alle dyne ghebreken.

b Psalm. 32.a.5.

4

Die dijn leuen vant verderuen verlost, die dy kroont met ghenade ende barmherticheyt.

5

^c Die dynen mondt vrolick maeckt, ende dat du weder ionck werst als eenen Arndt.

c Hiob. 33.c.25.

6

De Heere doet gherechticheyt ende gherichte, allen die onrecht lijden.

7

Hy heeft syne weghen Mose weten laten, de kinderen Israels zijn doen.

8

^d Barmhertich ende ghenadich is de Heere, gheduldich ende van grooter goedertierenheyt.

d Exod. 34.a.6. Psalm. 86.b.15. ende 145.a.8. 2.Esdr. 9.b.17. Num. 14.b.18.

9

Hy sal niet altoos ^e kijuen, noch eewichlick toorne behouden.

e Of. Onghenadich zijn.

B.10

Hy handelt niet met ons na onse sonden, ende vergheldet ons niet na onser misdaet.

11

^f Want so hooch den Hemel bouen der Aerden is, laet hy syne ghenade gheweldich zijn, ouer die, die hem vreesen.

f Psalm. 57.b.11. ende 108.a.5.

12

So verre het Oosten is vant Westen, laet hy onse ouertredinghe van ons zijn.

13

Ghelijc hem een Vader ouer de kinderen ontfermt, so ontfermt hem de Heere ouer die, die hem vreesen.

14

^g Want hy bekent wat wy voor een ^h werck zijn: hy denckt daeraen, dat wy stof zijn.

g Psalm. 78.d.39.

h Dat is, Hoe een swack, loos ghebouwte wy zijn, eens armen leuen

15

ⁱ Een mensche is in synen leuen als gras, hy bloeyet als een bloeme op den velde.

i Psalm. 90.a.6. Esa. 40.a.6. Iacob. 1.b.10. 1.Pet. 1.c.24. Syr. 14.b.15.

16

Wanneer den wint daerouer gaet, so is sy niet meer daer, ende hare stede ^k kentse niet meer.

k Dat is, Sy weet niet meer van der bloeme, denct ooc niet meer daeraen: dat is, daer blijft noch speurteecken noch ghedachtenisse.

17

^l De genade daerentegen des Heeren, ^m duert van eewicheyt tot eewicheyt, ouer die, die hem vreesen, ende syne gherechticheyt op kints kint,

l Psalm. 102.c.29.

m Of, blijft.

18

By dien, die zijn verbondt houden, ende ghedencken aen syne geboden, ⁿ dat sy daerna doen.

n Deut. 6.a.1.

19

De Heere heeft synen stoel in den Hemel bereydet, ende zijn Rijcke heerschet ouer alle dinck.

[fol. 195v]

C.20

^o Loeft den Heere ghy syne Engelen, ghy stercke Helden, ^p ghy die zijn beuel wtrichtet, ^q† dat men hoore de stemme zijns woorts.

o Psalm. 148.a.2.

p Heb. 1.b.14.

q† An. ende hooret der etc.

21

Loeft den Heere alle syne Heyrscharen, syne Dienaers, die ghy synen wille doet.

22

^r Loeft den Heere alle syne wercken, aen allen plaetsen, syner heerschappie: loeft den Heere mijn ziele.

r Psalm. 104.a.1. ende 146.a.1.