Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den Cj. Psalm.

1. Eenen HofPsalm, daer Dauid zijn eyghen exempel inne inuoert, hoe hy hebbe zijn Hofregiment aengherichtet, ende wat hem voor lieden tot dienste gheweest zijn in synen saken: Leert oock daerbeneuen, in wat grooten haet, hy door sulcken vlijt by den synen gekomen zy. Ende benoemet hier der Hoouelingen voornemelicksten ghebreken, dat sy zijn, verkeert, vloeckers, roouers. leughenachtighe, wellustsoeckers etc.

A.1

Eenen Psalm Dauids.

[fol. 195r]

VAn ghenade ende rechte wil ick singhen, ende dy Heere lof segghen.

2

Ick handele voorsichtich ende redelick by ^a† dien, die my toehooren, ende wandelen trouwelicken in mynen huyse.

a† An. tot dat du tot my koemst.

3

Ick neme my gheene boose sake voor, ick hate ^b† den ouertreders, ende late hen niet by my blijuen.

b† And. de ouertredinghe, dat sy aen my niet hanghen sal.

4

Een verkeert herte moedt van my wijcken, den boosen lijde ick niet.

5

Die synen naesten heymelicken ^c achterkoset, dien verdelge ick: ick mach dies niet, die stout ghebaer, ende hooghen moet heeft.

c dat is, Met liste ende vriendelicken schijne achterclapt

6

Myne ooghen sien na den trouwen in den lande, ^d dat sy by my woonen, ende hebbe gheerne vrome dienaers.

d Psalm. 15.a.1. ende 24.a.3.

7

Valsche lieden houde ick niet in mynen huyse ^e de leughenaers en dijen niet by my.

e Psalm. 5.a.7.

8

^f Vroech verdelghe ick alle Godloosen in den lande, dat ick alle quaetdoenders wtroeye, wt der stadt des Heeren.

f Psalm. 37.d.35. Hiob. 18.b.17. Prouerb. 2.c.22.