Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den xcj. Psalm.

1. Desen Psalm leeret den ghelooue, ende is vol lieflicker troostinghe, daer de Godureesenden Gods sorchuuldighe achtinghe ouer haer, syne regeringhe ende beleydinghe wt leeren. Sommighe meynen, hy ghehoore tot der Historie 2.Sam. 24. van der pestilencie, om Dauids sonden wille onder het volck gheschicket: dat de Godureesenden in sulck eenen plotzlicken ongheluck ende vare, eene ghewisse troostinghe hadden. Den strick des Iagers, zijn de pestilencie van den verstoorischen Enghel te weghe ghebracht. Die hier den hoogen verstandt inne volgen, bedieden de sonderighe vare, op allerley noodt, daer de Godureesenden onder staen.

A.1

VVie onder de bescherminge des Hoochsten sitt, ende onder de schaduwe des Almachtighen blijft.

2

Die spreect tot den Heere, ^a Mijn ^{b †} toeuersicht ende myne borcht, mijn God op dien ick hope.

a Psalm. 18.a.3

b Of, toeuerlaet

† And. hope

3

Want hy verlost my van den strick des Iaghers, ende van der schadelicker pestilencie.

4

^c Hy sal dy met synen vederen bedecken, ende dyne toeuersicht sal zijn onder synen vleugelen: syne ^d waerheyt is scherm ende schildt.

c Psalm. 121.a.4.

d Dat is, Het woordt ende toesegginge der ghenade.

5

^e Dat du niet verschricken moetest, voor den grouwel des nachts, ^f voor de pijlen die des daechs vlieghen.

e Hiob. 5.c.21.

f Ephe. 6.b.

6

Voor de pestilencie die in het duyster sluypt, ⁺ voor der sieckte, die in den middaghe verderuet.

+ Allerley ongheluck tooget hy hier mede aen, het zy gheweldt, onrecht, list, tucken, ende wreuel, etc.

7

Wanneer duysendt vallen aen dyner sijden, ende tien duysendt tot dyner rechter handt, so sal het doch dy niet treffen.

8

Ia du salt met dynen ooghen dynen lust sien, ende aenschouwen, hoe het den Godloosen vergolden werdt.

9

^g Want de Heere is dyne toeuersicht, de Hoochste is dyne toeulucht.

g Psalm. 18.b.19. Syrach. 34.b.16. Prouerb. 3.c.25.

B.10

Dy sal gheen quaet werderuaren, ende gheen plaghe en sal tot dyner hutten ghenaken.

11

^h Want hy heeft synen Engelen beuolen van dy, dat sy dy behoeden op alle dyne weghen.

h Matth. 4.a.6. Luc. 4.b.10. Exod. 23.c.20. Psalm. 34.a.8.

12

Dat sy dy op den handen draghen, ende du dynen voet niet aen eenen steen en stootest.

13

ⁱ Op den Leeuwen ende aderen saltu gaen, ende treden op de ionghe Leeuwen ende Draken.

i Luc. 10.b.19.

14

Hy begheert myner, so wil ick hem wthelpen: hy kent mynen Name, daerom wil ick hem beschutten.

15

^k Hy roept my aen, so wil ick hem verhooren, ick ben by hem in der noot: ick wil hem daer wt trecken, ende tot eeren maken.

k Psalm. 4.a.4. ende 50.b.15. ende 120.a.1.

16

Ick wil hem versadighen met langhen leuen, ende wil hem toonen mijn Heyl.