Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den xcij. Psalm.

1. Een troostlicke dancksegghinghe voor Gods goedertierenheyt ende ghenade, dat hy de vromen ende syne Kercke behoudet, den Godloosen daerenteghen, hoewel sy in eere ende welstandt bloeyen, ombrenghet.

A.1

Een Psalmliedt op den Sabbathdach.

2

DAt is een kostelick ^a dinck, den Heere dancken, ende lof singen dynen Name, du Hoochste.

a Hebre. 13.b.15.

3

Des morghens dyne ghenade, ende des nachts dyne waerheyt verkondighen.

4

Op den tien snaren ende Psalter, met spelen op der Harpen.

5

^b Want Heere du laetst my vrolick singhen van dyne wercken, ende ick roeme de gheschiedenissen dyner handen.

b Rom. 1.b.16. Sapien. 13.a.1.

6

^c Heere, hoe zijn dyne wercken so groot? dyne ghedachten zijn so seer ^d diep.

c Psalm. 111.a.2.

d Dat is, Wonderbaerlick, dat hy ons also mede helpet, dat het gheen mensche begrijpen noch bedencken konde.

7

Een dwaesachtich en ghelooft dat niet, ende een sot en achtet sulcks niet.

8

^e De Godlosen groenen als het gras, ende de quaetdoenders bloeyen alle, tot dat sy verdelghet werden, altoos ende eewichlick.

e Psalm. 37.d.35.

9

Doch du Heere bist de Hoochste, ende blijfst eewichlick.

B.10

^* Want siet, dyne vyanden, Heere siet, dyne vyanden sullen omkomen, ende alle quaetdoenders moeten verstroyt worden.

* Psalm. 37.c.20.

11

^f Daerenteghen mynen hoorne sal verhooghet worden, als eens Eenhoorns, ende worde ^g ghesaluet met verscher olye.

f Num. 23.c.22 ende 24.a.8. Hiob. 39.b.12.

g Dat is, Ick worde verheughet.

12

Ende mijn ooghe sal haren lust sien, aen myne vyanden, ende mijn oore sal haren lust hooren aen den boosachtighen, die hen tegen my setten.

13

De rechtueerdighe sal groenen als een palmboom, hy sal wassen als een Cederen op Libanon.

14

^h Die geplantet zijn in den huyse des Heeren, sullen in den Voorhouen onses Gods groenen.

h Rom. 11.b.16.

15

Ende wanneer sy oock oudt werden, sullen sy dannoch bloeyen, vruchtbaer ende versch zijn.

16

Dat sy verkondighen, dat de Heere so vroom is, mynen troost, ende ⁱ gheen onrecht is aen hem.

i Dat is, Hy siet gheene persoonen aen, ende helpet der Godloosen sake niet, als sy doch meynen.