Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den lxxxviij. Psalm.

1. Een ghebet teghen de aenuechtinghe der consciencie, die wt vertwijfelinghe, ende wt dien, datmen Gods toorne ende doodt voelt, her komen. Sodaniger Psalmen zijn daer noch sommighe hier voor aengheteeckent, 11. Ende dringet seer fijn daerop, dat daer Gods eere hooch inne gheuordert werde, dat hy de lieden wt sulcken aenuechtinghen verlosse, dewijle sy hem also dancken ende Predicken, ende wederom lasteren, so sy in aenuechtinghen verlaten werden.

A.1

Een Psalmliedt der kinderen Korah, voor te singhen, van der swackheyt der ellendighen: een onderwijsinghe Heman den Esrahiten.

2

HEere God mijn Heylandt, ick roepe dach ende nacht voor dy.

3

Laet mijn ghebedt voor dy komen, ^a neycht dyne ooren tot mynen roepen.

a Tren. 3.f.57. Psalm. 86.a.1.

4

Want mijn ziele is vol iammers, ende mijn leuen is na by der Hellen.

5

Ick ben gheachtet ghelijck dien, die ter Hellen varen: ick ben als een man, die geen ^b† hulpe en heeft.

b† And. kracht.

6

Ick ligghe onder den dooden verlaten, als de verslaghene, die in den graue ligghen, dier du niet meer ghedenckest, ende sy van dyner hant afghesondert zijn.

7

Du hebst my in den kuyl onderwaerts gheleyt, in de duysternisse ende in de diepte.

8

Dijn grimmicheyt drucket my, ende drengest my met alle dyne vloeden. Sela.

9

^c Myne vrienden hebstu verre van my ghedaen, du hebst my hen eenen grouwel ghemaect: ick ligghe gheuangen, ende kan niet wtkomen.

c Psalm. 69.a.6. ende 38.b.12. Iob. 19.b.14.

B.10

Mijn ghestalte is iammerlick van ellende, Heere ick roepe dy daechlicx aen, ick breyde myne handen wt tot dy.

11

^d Saltu dan onder den dooden wonder doen? oft sullen de verstoruene opstaen, ende dy dancken? Sela.

d Psalm. 6.a.6. ende 30.b.10. ende 115.b.17. Iesa. 38.b.18.

12

Salmen in den grauen vertellen dyne goedertierenheyt? ende dyne trouwe in het verderuen.

13

Moghen dan dyne wonderen in der duysternisse bekendt worden? ofte dyne gherechticheyt in den lande, daermen niets ghedencket?

14

Doch ick roepe tot dy Heere, ende mijn ghebedt koemt vroech voor dy.

15

Waerom verstootstu Heere mijn ziele, ende verberghest dijn aensicht voor my?

16

Ick ben ellendich ende amechtich, ^e† dat ick so verstooten ben, ick lijde dijn verschricken, dat ick schier vertzaghe.

e† An. Uan jeughet op, etc. verschricke ende ten alle tijdt in vreese mijns leuens.

17

Dyne grimmicheyt gaet ouer my, dijn verschricken drucket my.

18

Sy omgheuen my daechlicks als water, ende omringhen my met malcanderen.

19

Du makest, dat myne vrienden ende naesten, ende myne ^f† bekenden, hen verre van my doen, om sulcker ellenden wille.

f† An. verwandte, dat is, gewoonlicken, bekenden.