Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den lxxxvij. Psalm.

1. Een Prophecie van der Kercken des Nieuwen Testaments, dat sy zijn soude, als een stadt, die de gantsche werelt vulle, daerin gheboren ende opgheuoet werden, Mooren, Egypters, Babiloniers, Tyrers, Philisteen, ende aller tonghen lieden: (Ende dese gheboorte ende pobrenghinge, geschiet door het woort des Euangelij, daer de sonden in werden vergheuen, de herten door den ghelooue ghereynighet, ende het eewich leuen gheschencket.) ende dat de eenighe Godsdienst zijn soude, Gods eere ende barmherticheyt door het Euangelium besinghen ende predicken.

1

Een Psalmliedt der kinderen ^a† Korah. SY is ^b vast ghefondeert op de Heylige berghen.

a† And. Korah, welckes gront is van den Heyligen bergen. De Heere heeft de etc. lieuer dan alle etc.

b Psalm. 78.g.67

2

De Heere bemint de poorten Zions, ouer alle wooninghen Iacobs.

3

Heerlicke dinghen werden in dy ghepredict, ^c du stadt Gods. Sela.

c Heb. 12.c.22. Apoc. 21.a.2.

4

Ick wil predicken laten, ^d Rachab ende Babel, dat sy my kennen sullen: siet, die Philisteen ende Tyriers, met tsamen der Mooren, werden aldaer gheboren.

d Dat is, Egypten. Iesa. 30.a.7.

5

Men sal tot Zion segghen, dat allerley lieden daerin gheboren werden, ende dat Hy, die Hoochste, haer bouwet.

6

^e De Heere sal predicken laten, ^f in allerley spraken, datter sommighe ooc ^* aldaer sullen geboren werden. Sela.

e Marc. 16.b.17.

f Act. 2.a.4.

* te Zion.

7

Ende de ^g Sanghers als ^h† aen reyen, sullen alle in dy singhen, deen om het ander.

g Dat is, Alle die Musiken konnen, sullen hen ghebruycken om dy te louen.

h† And. ghelijck die op de fluyten spelen: ende alle mijn herkomsten zijn, in dy.