Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den lxxxvi. Psalm.

1. Biddet dat hy wt vare verlosset werde. Ende hy laet zijn gantsche ghebedt steunen, niet op eenighe syne verdiensten, maer alleen op Gods goedertierenheyt ende barmherticheyt, 8. daer hy een schoon wt gheschrey van inuoert, 11. ende biddet, dat hy in sulcken betrouwen, als Gods woordt mede brenghet, behouden werde. 12. Mengt hier oock een dancksegghinghe onder, als ware hy alreede verhoort.

A.1

Een ghebedt Dauids. HEere ^a neycht dyne ooren ende verhoort my, want ick ben ellendich ende arm.

a Psalm. 88.a.3. Tren. 3.f.57.

2

Bewaert mijn ziele, want ic ben ^b heylich: helpt du mijn God, dynen knechte, die hem verlaet op dy.

b Heylich kan hier oock heeten verdoemt ende verachtet, per Antiphrasin, als een ketter

3

Heere zijt my genadich, want ick roepe daechlicks tot dy.

4

Verheucht de ziele dijns knechts, want na dy Heere verlangt my.

5

^c Want du Heere bist goedt ende ghenadich, van grooter goedertierenheyt, allen die dy aenroepen.

c Ioel. 2.b.13.

6

Verneemt Heere mijn ghebedt, ende merckt op de stemme mijn smeeckens.

7

^d In der noodt roepe ick dy aen, du woudest my doch verhooren.

d Ione. 2.a.3. Psalm. 103.a.8. ende 145.a.8.

8

^e Heere, dy is niemant gelijck onder den Goden, ende daer is niemant die doen kan als du.

e Psalm. 89.a.7.

9

Alle Heydenen die du ghemaeckt hebst, sullen komen, ende voor dy aenbidden Heere, ende dynen Name eeren.

B.10

Dat du so groot bist, ende wonder doest, ende alleen God bist.

11

^f Wijst my Heere dynen wech, dat ick wandele in dyner waerheyt: behoudt mijn herte by den ^g eenighen, dat ick dynen Name vreese.

f Psalm. 25.a.4.

g Dat is, Gods woordt, dat blijft ende maeckt eenich: andere leere maect oneenicheyt ende rotterie.

12

Ick dancke dy Heere mijn God van gantzer herten, ende eere dynen Name eewichlick.

13

Want dyne goedertierenheyt is groot ouer my, ^h ende hebst mijn ziele verlost wt der dieper Helle.

h Psalm. 30.a.4.

14

God, de stoute setten hen tegen my, ende den hoop der Tyrannen, staet my na myner zielen, ende hebben dy niet voor ooghen.

15

ⁱ Du daerenteghen Heere God bist barmhertich ende ghenadich, gheduldich ende van grooter goedertierenheyt ende trouwe.

i Exod. 34.a.6. Nume. 14.b.18. Psalm. 103.a.8. ende 145.a.8. Ioel. 2.b.13. Ione 14.a.2.

16

Wendet dy tot my, zijt my ghenadich: sterckt dynen knecht met dyner macht, ende helpt ^k den sone dyner maghet.

k Psalm. 116.b.16.

17

Doet een teecken aen my, dat het my wel ga: dat het sien, die my haten, ende hen schamen moeten: dat du my bystaest, Heere, ende troostest my.