Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den lxxxi. Psalm.

1. Desen Psalm songmen aen de Loofhutten feeste, dat daer inghesettet was ter gedachtenisse hes wttochs wt Egypten landt. Ende hier veruatet de Prophete, de leere des eersten ghebots, dat sy alleene den God, diese wt Egyptenlandt gheuoert heeft, betrouwen, ende hem voor Afgoderie vermijden: hangt oock hier aen de toesegghinghen ende bedrenginghen, die in de eersten gheboden zijn.

A.1

^a† Op der Githith, voor te singhen, Assaph.

a† And. voor de Wijnpersse.

2

SInghet vrolicken Gode, die onse sterckte is, iuychet den Gode Iacobs.

3

Neemt de Psalmen, ende gheeft herwaerts de Tamborinnen, lieflicke Harpen met Psalteren.

4

Blaest in de nieuwe Mane de Basuynen, ^b† in onsen Feeste der Loofhutten.

b† And. te bestemder tijt, ende aen onsen hoochtijtlicken Feeste. Leuit. 23.d.34.

5

^c Want sulcks is een wijse in Israel, ende een recht des Gods Iacobs.

c Num. 10.a.2.

6

^d Sulcks heeft hy ter ghetuyghenisse ghesettet onder Ioseph, doe sy wt Egypten landt toghen, ende vreemde spraken ghehoort hadden.

d Gene. 41.e.45.

7

Ende hy hare schouderen van den last ontledighet hadde, ende hare handen der potten los werden.

8

^e Doe du my in der noodt aenriepest, halp ick dy wt, ende verhoorde dy, ^f† doe dy het weder oueruiel: ^g Ende versochte dy aent Twistwater. Sela.

e Exod. 3.a.7.

f† An. onder den donder verborgen. Exod. 19.b.16.

g Exod. 17.a.6.

9

Hoor mijn volck, ick wil onder dy getuygen, Israel du salt my hooren.

B.10

^h Dat onder dy gheen ander God zy, ende dat du gheenen vreemden God aenbiddest.

h Exod. 20.a.2.

11

ⁱ Ick ben de Heere dijn God, die dy wt Egypten landt geuoert heeft: doet dynen mondt wijt op, laet my hem vullen.

i Deute. 5.a.6.

12

^k Doch mijn volck hoorde mijn stemme niet, ende Israel wil myner niet.

k Prouer. 1.c.24.

13

^l So hebbe ickse gelaten in haers herten goetduncken, dat sy wandelen na haren rade.

l Roma. 1.c.20. Act. 14.b.16.

14

^m Woude mijn volck my ghehoorsaem zijn, ende Israel op mynen weghe gaen.

m Baruc. 3.b.13.

15

So woude ick hare vyanden in korten dempen, ende myne handt ouer haer wederpartiders wenden.

16

Ende die den Heere haten, moesten aen hem faelgheren, haren tijdt dan woude eewichlick dueren.

17

Ende ic soudese met der bester tarwe spijsen, ⁿ ende met Honich wt den rotzsteenen versadighen.

n Deute. 32.b.13.