Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den lxxx. Psalm.

1. Een schoon ghebedt ghelijcken inhoudts met den vorighen Psalm: want hy biddet, dat God voor den omligghenden Heydenen het Rijcke Israels (in den tijtel een Lelie ghenoemt, ende in den Psalm eener lustighen Rancke vergheleken, die van Gode wt Egypten ghenomen, door zijn woort is opghetuyghet ende ghebouwet) beschermet: ende wert oock nu wel teghen der Kercken vyanden ghebeden.

A.1

Eenen Psalm Assaph, van den ^a spanroosen, voor te singhen.

a Een kleynoodt als een Roose, ende heet hier het Konincrijcke Israel.

2

DV herder Israels, hoort, du die ^b Ioseph hoedest als de schapen: verschijnt du die sittest bouen Cherubim.

b Dat is, Het Konincrijck Israels Psalm. 99.a.1.

3

Verweckt dijn ghewelt, du die ^c voor Ephraim, BenIamin ende Manasse bist, ende koemt ons te hulpe.

c Dat is, Op den Ghenadenstoele, achter welcken dese stammen Israels laghen. Num. 2.b.18.

4

God ^d trooste ons, ende laet lichten dijn aensicht, so ghenesen wy.

d Anders brengt ons weder.

5

Heere God ^e† Zebaoth, hoe langhe wiltu vertoornen, ouer den ghebede dijns volcks?

e† And. der heyrscharen.

6

^f Du spijsestse met tranenbroodt, ende drenckestse met grooter mate vol tranen.

f Psalm. 42.a.4.

7

^g Du settest ons onsen nabueren ten ^h gekijf, ende onse vyanden spotten onser.

g Psalm. 79.a.4.

h Dat is, Dat een yeghelick oorsake tot ons soect, ons ouerualt, ende vyer by ons halet.

8

God Zebaoth troost ons, laet lichten dijn aensicht, so ghenesen wy.

9

ⁱ Du hebst eenen wijnstock wt Egypten ghehaelt, ende hebst verdreuen de Heydenen, ende den seluen gheplantet.

i Iesa. 5.a.1. Iere 12.b.10. Matt. 21.d.33.

B.10

Du hebst voor hem de bane ghemaeckt, ende hebst hem laten inwortelen, dat hy het lant veruult heeft.

11

Berghen zijn met syner schaduwe bedeckt, ende met synen rancken de ^k cederen Gods.

k Dat is, Het Rijcke is wtghebreydet tot aen Libanon.

12

^l Du hebst synen wasdom wtghebreydet tot aen de Zee, ende syne tacken tot aen het ^m water.

l Psalm. 72.a.8.

m Dat is, Het water Phrath.

13

Waerom hebstu dan synen ⁿ tuyn gebroken, dat hem ^o† verschuert, alles wat voorby gaet.

n Psalm. 89.e.44. Iesai. 5.a.5.

o† And. Afweydt.

14

^p De wilde swijnen hebben hem verwoelt, ende ^q de wilde dieren hebben hem ^r† verdoruen.

p Iesa. 7.b.13.

q Cant. 2.b.15.

r† An. Afghegheten.

15

God Zebaoth, wendet dy doch, schouwet van den Hemel, ende siet aen, ende besoeckt desen wijnstock.

16

Ende houdt hem in bouwinge, die dijn rechter handt gheplant heeft, ende dien du dy vast verkoren hebst.

17

^s Siet daerin ende scheldt, dat des bernens ende scheurens een eynde werde.

s An. Hy is met vyer verbrant, ende wtgehouwen, ende sy sullen van dynen schelden omkomen. 2.Para. 36 b.17.

18

Dijn handt, beschutte het volck dyner rechter hant, ende de lieden, die du dy vast verkoren hebst.

19

So willen wy niet van dy wijcken: laet ons leuen, so willen wy dynen Name aenroepen.

20

^t Heere God Zebaoth troost ons, laet dijn aensicht lichten, so ghenesen wy.

t Psalm. 80.a.4.