Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

[fol. 191v]

Den lxxix. Psalm.

1. Is ghelijcken inhoudts met den 74. Psalm: siet de komstighe verstooringhe des Tempels ende des volcks, ende biddet om hulpe.

A.1

Eenen Psalm Assaph. HEere, ^a Heydenen zijn in dijn erue gheuallen, die hebben dynen Heylighen Tempel veronreynicht, ^b ende van Ierusalem steenhoopen ghemaeckt.

a 2.Para. 36.b.17.

b Iere. 9.b.11.

2

^c Sy hebben de lichamen dyner knechten, den voghelen onder den Hemel te eten ghegheuen, ende het vleesch dyner Heylighen, den dieren in den lande.

c Iere. 15.a.3. ende 16.a.4. ende 34.c.20. Deut. 28.c.26. 1.Macha. 7.b.17.

3

Sy hebben bloedt vergoten rontom Ierusalem, als water, ende daer was niemandt die begroef.

4

^d Wy zijn onsen nabueren een smaetheyt geworden, eenen spot ende schimp dien, die rontom ons zijn.

d 1.Reg 9.a.7. Psalm. 31.b.12. ende 44.b.14. Iere. 19.a.8.

5

Heere, ^e hoe langhe wiltu so gantsch vertoornen? ende dynen ijuer, als vyer bernen laten?

e Iesai. 64.c.22.

6

^f Schuddet dyne grimmicheyt op de Heydenen, die dy niet kennen, ende op de Koninckrijcken, die dynen Name niet aenroepn.

f Iere. 10.c.25.

7

Want sy hebben Iacob opghegheten, ende syne huysen verwoestet.

8

^g Ghedenct niet onser voorleden misdaet, ontfermet dy onser in korten, want wy zijn seer dunne gheworden.

g Iesa. 64.a.9.

9

Helpt du ons, God onse helper, om dijns Naems eere wille: verlost ons, ende vergheeft ons onse sonden, om dijns Naems wille.

B.10

Waerom laetstu de Heydenen seggen: ^h waer is nu haren God? laet onder den Heydenen voor onsen oogen kont worden, de wrake des bloets dyner knecten, dat verghoten is.

h Psalm. 42.a.4. 115.a.2.

11

Laet voor dy komen het suchten der gheuangenen, na dynen grooten arme behoudt de kinderen ⁱ des doots.

i Dat is, Diemen daechlicks wech worghen, ende gantsch wtroyen wil.

12

Ende vergeldt onsen nabueren seuenuoudich in haren schoot, hare smaetheyt daermede sy dy Heere gheschendet hebben.

13

^k Wy daerentegen dijn volck, ende schapen dyner weyde, dancken dy eewichlick, ende verkondighen dynen roem voort ende voort.

k Psalm. 95.a.7. ende 100.a.3.