Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den lxxij. Psalm.

1. Een sonderlinge prophecie vanden Rijcke Christi, ende Christo selfs, Dat hy God zy: 5. want hem (seyt hy) salmen vreesen, so langhe, etc. Item, 11. Alle Koningen sullen hem aenbidden, etc. Dat in zijn Rijcke zy, vergheuinghe der sonden, 7. oueruloedighe gherechticheyt, 4. verlossinghe der ellendigen ende armen: welcke weldaden hy hooch prijst, 12. seyt oock daerby van het cruyce, dat, die onder desen Rijcke zijn, hare vyanden hebben, ende ghemoordet werden, 14. daer hyse dannoch in troostet, dat dese hare doodt niet schandelick noch boose, maer gantsch diere geachtet werdt voor Christo. 17. aen het eynde wort hier toe ghesettet, vanden dienst der Kercken, van wtkondinghe der weldaet Christi.

A.1

Des Salomons. GOd geeft dijn gherichte den Koninck, ende dijn gerechticheyt des Konincx Sone.

2

^a Dat hy dijn volck ^b† brenge tot der gherechticheyt, ende dyne ellendighen verlosse.

a Deut. 17.b.18.

b† And. richte met gherechticheyt, ende dyne bekommerden met gherichte.

3

Laet de berghen den vrede brenghen onder het volck, ende de kleyne bergen de gherechticheyt.

4

Hy sal het ellendigh volck by den rechte behouden, ende den armen helpen, ende de lasteraers versmijten.

5

Men sal dy vreesen, ^c so langhe de Sonne ende Mane duert, van kinde tot kints kinderen.

c Psal. 89.d.30.37.

6

Hy sal af varen, als den regen op het ^{d †} velt, als de druppen die het lant vochtighen.

d Als Gideon geschiedde. Iudic. 6.d.37.

† And. gemaeyde.

7

Te synen tijden sal bloeyen de rechtueerdige, ende grooten vrede, tot dat de Mane niet meer en is.

8

^e Hy sal heerschen vander eender Zee tot aen de ander, ende van den ^f water aen, tot der werelt eynde toe.

e Exod. 13.d.31. 1.Regum. 4.c.25. Psalm. 80.b.12. Sacha. 9.a.8.

f Dat is, van de Iordane.

9

Voor hem sullen hen neyghen, die in de woestijnen zijn, ende syne vyanden sullen het stof lecken.

B.10

^g De Koninghen aen de Zee, ende in den eylanden, sullen gheschencken brenghen: de Koninghen wt rijck Arabien ende Seba, sullen gauen toe voeren.

g 1.Reg. 10.a.1. Esaie. 60.a.6. Matth. 2.b.11.

11

Alle Koninghen sullen hem aenbidden: alle Heydenen sullen hem dienen.

12

Want hy sal den armen verlossen, ⁺ die daer schreyet, ende den ellendighen, die gheenen hulper en heeft.

+ Een Koninck der armen roependen.

13

Hy sal ghenadich zijn den ^h kleynen ende armen, ende den zielen der armen sal hy helpen.

h Of, slechten, verworpen.

14

Hy sal hare zielen wt der bedriegherie ende ⁱ wreuel verlossen, ende haer bloet sal diere gheachtet worden voor hem.

i Of, moetwilliger onbillicheyt, schamperheyt.

15

Hy sal leuen, ende men sal hem vanden goude wt rijck Arabien geuen, ende men sal altoos voor hem bidden, daghelicx salmen hem louen.

16

Op Aerden bouen op den bergen, sal ^k het koorne dick staen, zijn vrucht sal ^l beuen als Libanon, ende sal groenen inden steden, als gras op Aerden.

k An. slechs een handtuol koorns [saeyen] ende zijn, etc.

l Dat is, Den berch Libanon staet dicke van boomen, ende beeft wanneer de wint waeyt: also dicke sal oock het Euangelium staen ende beuen in den steden. Dat is, het Euangelium ende de Christenen sullen rijckelic wassen ende toenemen.

17

Synen Naem sal eewichlick blijuen: so lange de Sonne duert, sal synen Name op de nakomelingen ^m reycken, ende ⁿ sullen door den seluen ghesegent zijn: alle Heydenen sullen hem prijsen.

m Dat is, Men sal synen Naem altijts prediken, van geslachte tot geslachte: hoewel de oude steruen, so doen het doch de nacomelinghen.

n Gene. 12.a.3. ende. 21.b.18.

18

Gheloeft zy God de Heere, de God Israels, ^o die alleene wonder doet.

o Iudic. 13.b.19. Psalm. 136.a.4.

19

Ende gheloeft zy synen heerlicken Name eewichlick, ende alle landen moeten syner eere vol worden. Amen, Amen.

De ghebeden Dauids, des soons Isai, hebben een eynde.