Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

[fol. 189v]

Den lxxj. Psalm.

1. Desen Psalm is sonder tijtel, misschien, dat het een ghemeyn gebet zy der gantscher Kercken van allen tijden herwaerts, voor de behoudinghe des woorts, ende verlossinghe vanden tyrannen ende veruolghers, die de Kercke, gelijck als tot allen tijden, also in sonderheyt in den laetsten tijden, als in haren ouderdom, hebben sal: want dan sullen de Gheest ende andere gauen also niet, als inder eersten Kercken, ende onder den Propheten, in swanghe gaen.

A.1

HEere ^a ick vertrouwe op dy, en laet my nemmermeer te schanden worden.

a Psalm. 7.a.4. ende. 25.a.1. ende. 31.a.1. Syrach. 2.b.12.

2

Verlost my door dyne gerechticheyt, ende helpt my wt: neycht dyne ooren tot my, ende helpt my.

3

Sijt my eenen stercken ^b† troost, daerhenen ick altoos vlieden moghe, du die toegheseyt hebst my te helpen: want du bist mijn rotzsteen ende borcht.

b† And. rootz.

4

Mijn God helpt my wt der hant des Godloosen, wt der hant des onrechtueerdighen ende tyrannen.

5

^c Want du bist mijn toeuersicht Heere, mijn hope van mijnder ieughet aen.

c Psalm. 22.b.10. ende 91.a.9. Syrach. 34.b.16.

6

Op dy hebbe ick my verlaten van moeders lijue aen: ^d du hebst my wt mynes moeders lijf ghetoghen: mynen roem is altoos van dy.

d Ierem. 1.a.5.

7

Ick ben voor velen als een wonder, doch du bist mijn stercke toeuersicht

8

Laet mynen mont dijns roems, ende dijns prijs vol zijn daghelicx.

9

^e Verworpt my niet in mynen ouderdom, verlaet my niet, wanneer ick swack worde.

e Psalm. 71.b.18.

B.10

Want mijn vyanden spreken teghen my, ende die op mijn ziele houden, ^f beraden haer met malcanderen,

f Psalm. 2.a.2.

11

Ende spreken, God heeft hem verlaten: iaecht na ende grijpt hem: want daer en is gheen verlosser.

12

God weest niet verre van my: mijn God haest dy my te helpen.

13

^g Schamen moeten hen ende omkomen, die mijn ziele teghen zijn: met schande ende schimp moeten sy ouerschuddet worden, die mijn ongeluck soecken.

g Psalm. 35.c.26. ende 70.a.3.

14

Ick ymmers wil altoos ^h† herdden, ende wil altoos dijns roems meer maken.

h† And. verwachten.

15

Mynen mondt sal verkondighen dyne gherechticheyt, daghelicx dijn Heyl, die ick niet alle tellen en kan.

16

Ick ga henen inder kracht des Heeren Heeren: ick prijse alleen dyne gherechticheyt.

17

God du hebst my van ieughet op gheleert, daerom verkondighe ick dyne wonder.

18

Oock ⁱ verlaet my niet God inden ouderdom, wanneer ick grau worde, ^* tot dat ick dynen arm verkondighe kints kinderen, ende dijn kracht, allen die noch komen sullen.

i Psalm. 71.a.9.

* Deute. 6.c.20.

19

God dyne gherechticheyt is hooch, du die groote dinghen doest: God wie is dy ghelijck?

C.20

^k Want du laetst my beproeuen vele ende grooten angst, ende makest my weder leuendich, ende halest my weder wt der diepten der Aerden op.

k 1.Sam. 2.a.6. Tob. 13.a.2. Sap. 16.b.13.

21

^l Du makest my seer groot, ende troostest my weder.

l 2.Sam. 7.a.9.

22

So dancke ick oock dy met psalterspel voor dyne trouwe, mijn God: ick lofsinghe dy op der harpen, du Heylighe in Israel.

23

Myne lippen ende mijn ziele, die du verlosset hebst, zijn vrolick, ende lofsinghen dy.

24

Oock dichtet mijn tonghe daghelicx van dyner gerechticheyt: ^m want schamen moeten hen, ende te schanden worden, die mijn ongheluck soecken.

m Psalm. 35.c.26. ende 40.b.15. ende 70.a.3. ende 71.b.13.