Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den lxv. Psalm.

1. Eenen lieflicken Psalm, veruatet vooraen een dancsegghinghe, 4. daerna een ghebedt om vergheuinghe der sonde, om bestandicheyt in den woorde ende verhooringe, 10. ten laetsten vertelt hy Gods weldaden in wterlicken leuen, dat hy vrede gheeft, het landt seghent, etc. also dat het gantsche Iaer zy als eenen lustigen krantz, van Gods weldaden ghemaeckt. Sommighe beduyden de woorden deses Psalms in hoogheren verstande, vant Rijcke Christi ende den nieuwen Testamente, ende dat wt oorsake des derden ende sesten versses: want sodaner Prophecien is niet weynich, die met ghelijcken deckreden verwickelt zijn.

A.1

Eenen Psalm Dauids ten liede, ⁺ voor te singhen.

+ Desen Psalm louet God der goeden vredesamen tijdt haluen.

2

GOd, men loeft dy in der ^a stilheyt te Zion, ende dy betaeltmen gheloften.

a Dat is, In der ghedult, datmen hem lijdet ende stille is, etc.

3

Du verhoorest het ghebedt, daerom koemt alle vleesch tot dy.

4

Onse misdaedt druckt ons hardt, du woudest doch onse sonden vergheuen.

5

^b Wel dien, dien du verkiesest, ende tot dy laetst, dat hy woone in dyne houen: die heeft rijcken troost van dynen heyligen Tempel.

b Ephe. 1.a.4.b.11

6

Verhoort ons na der wonderlicker gherechticheyt, God onse Heyl, die du bist de toeuersicht aller op Aerden, ende verre aen de Zee.

7

Die de berghen vast settet in syner kracht, ende ^c gherustet is met macht.

c Dat is, Ymmer voortaen ende meer goedes te doen.

8

^d Die du stillest het bruysen des Zees, het bruysen harer wallen, ende het ^e woeden der volcken.

d Psalm. 89.a.9. Matth. 8.c.26.

e Of, opwoelen.

9

Dat hen ontsetten, die aen den seluen eynden woonen, voor dyne ^f teeckenen: du makest vrolick alles wat hem herwt maket, beyde des morghens ende auondts.

f Dat is, Het zijn enckel groote wonderwercken, wanneer God vrede houdt, ende stueret den onureedsamen: so gaet dan ende verwandelt hem, beyde de menschen ende het vee, welckes in den krijch niet zijn kan.

B.10

Du besoeckest het landt ende waterst het, ende makest seer rijcke: ^g Gods springborne heeft de volheyt: du laetst haer koornen wel ghelucken: want also bouwestu het landt.

g Gods springborne, is zijn landt ende volck. Psalm. 46.b.

11

Du drenckest syne voren, ende vochtest dat gheploecht is: met reghen makestu het weeck, ende seghenest syne vruchten.

12

Du kroonest het Iaer met dynen goede, ende dyne ^{h †} voetstappen druppen van vette.

h Dat is, Waer hy gaet, daer wast het wel.

† And. waghe leesen, of wolcken.

13

De wooninghen in der woestijne zijn oock vett, dat sy druppen, ende de kleyne berghen zijn rontom lustich.

14

De driessen zijn vol schapen, ende de landouwen staen dick met koorne, datmen iuychet ende singhet.