Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den lxij. Psalm.

1. Uooraen is een sonderlinghe troostinghe ende exempel, dat wy in vaerlicheyden, ons onse betruowen ende toeuersicht Godlicker hulpe, niet ontrucken en laten, 9. daerna vermaent hy, dat wy met mistrpuwen menschelickes bystands (dat doch ongewisse, ia niets is) ons op Gods almachticheyt ende goedtheydt, die eene ghewisse toeuersicht gheuen, verlaten. Hier schijnen in sonderheydt aenghetoghen te werden de machtighe houelinghen, die haer gheweldt ende vermoghen, daer sy mede verdooft zijn, sonder eenich achterdencken, tot onderdruckinghe der vromen, misbruycken.

A.1

Eenen Psalm Dauids, voor Ieduthun, voor te singhen.

[fol. 188r]

2

MIin ziele is stille ^a tot God, die helpet my.

a Dat is, Sy is te vreden, laet God regeren, murret ende woedt niet, maer lijdet haer, ende bestaet.

3

Want hy is mynen ^b† troost, mijn hulpe, mijn beschuttinghe, dat my gheenen val storten sal, hoe groot hy oock is.

b† And. rootz of vels.

4

Hoe langhe stellet ghy alle eenen ^c† na, dat ghy hen verworcht, als een hanghende wandt, ende verschuerden muer?

c† And. na? ghy sullet alle ommekomen, als etc.

5

Sy dencken slechs, hoe sy hem dempen, beulijtigen hen der leughen, gheuen goede woorden, int herte daerenteghen vloecken sy. Sela.

6

Doch mijn ziele bestaet alleen op God, want hy is mijn hopeninghe.

7

Hy is mijnen troost, mijn hulpe, ende mijn beschuttinghe, dat ick niet vallen en sal.

8

By God is mijn Heyl, mijn eere, den rotzsteen myner sterckte, mijn toeuersicht is op God.

9

Hoept op hem alle tijt, lieue lieden, ^d schuddet uwe herten voor hem wt, God is onse toeuersicht. Sela.

d 1.Sam. 1.b.15. Psalm. 42.a.5.

B.10

Daerenteghen de menschen zijn doch niets, groote lieden ^e feylen oock: sy weghen weynigher dan niets, so vele harer is.

e Dat is, Wie hem op menschen verlaet, die feylet, hoe groot sy ooc zijn, so is het doch niets met hen, ende moet feylen.

11

^f Verlaet v niet op onrecht ende ^g† wreuel: houdet v niet tot sulcken, dat niets is: valt v rijckdom toe, so hanget het herte niet daeraen.

f Syr. 5.a.1. 1.Tim. 6.b.17.

g† Of, moedtwillige onbillicheyt. And. roof.

12

God heeft een woort ghesproken, dat hebbe ick somtijts gehoort, dat God alleen machtich is.

13

Ende du Heere bist genadich, ^h ende betalest eenen yeghelicken, als hy het verdient.

h Matth. 16.c.27. Hiob. 34.b.11. Ierem. 17.b.10. ende 32.b.19. Rom. 2.a.6. 1.Corint. 3.a.4. ende 14.b.12. Galat. 6.a.5. Apoca. 2.c.23. ende 22.b.12.