Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den lxi. Psalm.

1. Een ghebedt voor Koninck ende Rijcke, dat hy by den warachtigen Godsdienst blijue, ende het Rijcke door nieuwe veranderinghe, niet ontrust en worde.

A.1

Eenen Psalm Dauids, voor te singhen op een snarenspel.

2

HOort God mijn schreyen, ende merckt op mijn ghebedt.

3

Hier beneden op Aerden roepe ick tot dy, wanneer mijn herte in angste is: du woudest my doch voeren op eenen hoogen rotzsteen.

4

^a Want du bist mijn toeuersicht, eenen stercken torren voor myne vyanden.

a Psalm. 18.b.19. ende 91.a.9. Syrach 34.a.16.

5

Ick wil woonen in dyner hutten eewichlick, ende betrouwen onder dyne vleughelen. Sela.

6

Want du God hoorest mijn ^b ghelofte: du ^c beloonest dien wel, die dynen Name vreesen.

b Dat is, Dat ick dy loue ende aenroepe als eenen God: welcker wy int eerste gebot Gode belouen.

c And. gheefst erue dien, die etc.

7

Doe geefst eenen Koninck een lanc leuen, dat syne Iaren dueren altoos voort ende voort.

8

Dat hy altoos sittende blijft voor God: vertoont hem goedicheyt ende trouwe, dat sy hem behoeden.

9

So wil ick dynen Name lofsinghen eewichlick, dat ick myne ghelofte betale daechlicks.