Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den lix. Psalm.

1. Den tijtel wijst den inhoudt aen: de Historie is 1.Sam. 19. want hy biddet teghen Saul ende synen aenhanck, dat sy hem ontschuldighen, niet beschadighen. Wert van sommighen bediedet op den persoon Christi, die daer biddet teghen de Godloose Synagoghe: ende tis waer, beyder Christi ende Dauids vyanden is gelijckes wederuaren: want beyde zijn sy omkomen. Is een gantsch heftich ghebet, derhaluen het oock vele wederhalinghen heeft.

A.1

Een gulden kleynoodt Dauids, (dat hy niet omquame) ^a Doe Saul henen sandt ende liet zijn huys bewaren, dat hy hem doodede.

a 1.Sam. 19.b.11.

2

VErlost my mijn God, van mynen vyanden, ende beschut my voor dien, die hen teghen my setten.

3

Verlost my van den quaetdoenders, ende helpt my van den bloetghierighen.

4

Want siet Heere, sy loeren op mijn ziele, de Stercken vergaderen hen teghen my, sonder schuldt ende misdaet.

5

Sy loopen sonder mijn schuldt, ende bereyden hen: waeckt op, ende ontmoetet my, ende siet daerin.

6

Du Heere God Zebaoth, God Israels, waeckt op, ende soeckt te huys alle Heydenen: ^b zijt niemanden genadich van dien, die so moetwillighe quaetdoenders zijn. Sela.

b Dat is, Laet dy haer boose voornemen niet behaghen, ende help niet, dat haer boosheyt voort ga.

7

^c† Des auonts laetse wederom ooc huylen als de honden, ende in der stadt rontom loopen.

c† And. Sy gaen ende keeren weder aen den auont huylen etc. ende loopen in etc. omher, Psalm. 59.b.15.

8

Siet, sy spreken met malcanderen, sweerden zijn in hare lippen: ^d wie soude het hooren?

d Dat is, Sy doen als warer gheen God, die het hoorde: ende segghen noch dencken niet, dat het eenmael moet luydtbaer worden.

9

^e Doch de Heere sal harer lachen, ende aller Heydenen spotten.

e Psalm. 2.a.4.

B.10

Voor harer ^f macht houde ick my tot dy: want God is mijn beschuttinghe.

f Dat is, wanneer sy my te machtich zijn, so sie ic op dy

11

God vertoont my rijckelic zijn goedertierenheyt: God laet my mynen lust sien aen myne vyanden.

12

Verworchtse niet, dat het mijn volck niet en verghete, maer verstroytse met dyner macht, Heere onse Schildt, ende stootse tonder.

13

^g† Hare leere is enckel sonde, ende ^h verharden in harer hooueerdie, ende predicken enckel vloecken ende wederspreken.

g† And. Om der sonden wille haers mondts, ende der reden harer lippen, laetse in harer hoouerdie geuanghen werden, die met meyneeden ende leugenen omgaen. And. slapen gaen eer sy satt etc.

h Dat is. Sy blijuen op haren trotze ende stoutheyt.

14

Verdelchtse sonder alle ghenade, dat sy niets zijn, ende beuinden, dat God heerscher zy in Iacob, in aller werelt. Sela.

15

Des auonts laetse wederom oock huylen, als honden, ende in der stadt herom loopen.

16

Laetse henen ende her loopen, om spijse, ende murmureren wanneer sy niet satt werden.

17

Ic ia wil van dyner macht singen, ende des morgens roemen dijn goedertierenheyt: want du bist mijn beschuttinge ende toeulucht, in myner noot.

18

Ick wil dy mijn God lofsinghen: want du God bist myne beschuttinghe, ende mijn ghenadighe God.