Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den lviij. Psalm.

1. Den tijtel deses Psalms gheeft wt, hy zy eens inhoudts met den voorgaenden: want hy biddet teghen Saul, ende die, die den seluen teghen Dauid, als teghen eenen oproerisschen verweckten. Uooraen is eene heftighe bescheldinghe der wedersakers, 7. daerna eenen vloeck der seluen, 11. ende aent eynde een troostinghe der vromen.

A.1

Een gulden kleynoodt Dauids, voor te singhen, dat hy niet om en quame.

2

SIit ghy dan stom, dat ghy niet spreken en wilt wat recht is, ende richtet wat ghelijck is, ghy nienschen kinderen?

3

Ia, moetwillich doet ghy onrecht in den lande, ende gaet stracx door met uwen handen ^a te wreuelen.

a Of, stoutelick te verongelijcken

4

De Godloosen zijn ^b† verkeert van ^c moeder lijue aen, de leugenaers dolen van moeder lijue aen.

b† An. verureemdet.

c Dat is, Haren aert is niet goet, ende laten van aert niet.

5

Haer woeden is als het woeden eener slangen, ^d als een dooue ader, die hare ooren toestopt.

d Act. 7.f.53.

[fol. 187v]

6

Dat sy niet en hooren de stemme des touenaers, des besweerders, die wel besweeren kan.

7

God, verbreect hare tanden in haren monde, stoot ontwee Heere de backtanden der ionghen Leeuwen.

8

Sy sullen vergaen als water, dat daer henen vliet: sy ooghen met haren pijlen, doch de selue verbreken,

9

Sy vergaen als een flecke versmachtet, als een ontijdige gheboorte eener vrouwen, sien sy de Sonne niet.

B.10

^e Eer uwe ^f† doornen rijp worden an den doorn struyc salse een toornicheyt so versch wech rucken.

e Dat is, Eer sy het half daer henen brenghen, daer sy henen willen, salse Gods toorne verstooren, ende den rechtueerdighen helpen.

f† An. potten een doornenuyer geuoelen, sal etc.

11

^g De rechtueerdighe sal hem verblijden, wanneer hy sulcke wrake siet, ^h ende sal syne voeten baden in des Godloosen ⁱ bloet.

g 1.Sam. 25.d.39.

h Psalm. 68.c.24.

i Dat is, De wrake sal grooter worden, als yemant begeert: dat waer hy een druppel bloedts ende wrake begeert, daer sal des so vele zijn, dat hy mochte daerinne baden.

12

Dat de lieden sullen segghen: De rechtueerdighe sal des ymmers ghenieten, God is dannoch Richter op Aerden.