Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den lvij. Psalm.

1. Een ghebet den voorgaenden niet onghelijck, in eener anderen vaerlicheyt (daer van 1.Sam. 21. ende 24.) van Dauid ghedichtet.

A.1

Een gulden kleynoodt Dauids, voor te singhen (dat hy niet om en quame) ^a doe hy voor Saul vluchtede in de speloncke.

a 1.Sam. 21.a.1. ende 24.a.4.

2

SIit my genadich, God, zijt my genadich: want op dy betrout mijn ziele, ^b ende onder de schaduwe dyner vleugelen hebbe ic toeulucht, tot dat het ^c ongheluck voor by ga.

b Matth. 23.d.37.

c Dat is, Schade ende leedt dat sy mij doen.

3

Ick roepe tot God den Alderhoochsten, tot God, die mijns iammers een eynde maeckt.

4

Hy sendet van den Hemel ende helpet my, van der versmaetheyt mijn versinckers, Sela: God sendet syne goedertierenheyt ende trouwe.

5

Ick ligghe met myner zielen onder den Leeuwen, der menschen kinderen zijn vlammen, hare tanden zijn glauien ende pijlen, ende hare tonghen, scherpe sweerden.

6

Verheft dy God ouer den Hemel, ende dyne eere ouer alle werelt.

7

^d Sy stellen mynen gange netten, ende drucken mijn ziele neder: ^e sy grauen voor my eenen kuyl, ende vallen selfs daerin. Sela.

d Psalm. 35.a.7. ende 119.e.40. ende 140.a.6.

e Psalm. 7.b.16. Prouer. 26.c.27. Eccle. 10.a.4. 1.Hest. 7.b.10.

8

^f Mijn herte is bereydt, God, mijn herte is bereydt, dat ick singhe ende loue.

f Psam. 108.a.1.

9

Waeckt op mijn ^g eere, waeckt op Psalter ende Harpe, vroech wil ick opwaken.

g Dat is, Mijn Psalter ende liedt, daer ick God mede eere.

B.10

Heere ick wil dy dancken onder den volcken, ick wil dy lof singhen onder den lieden.

11

^h Want dijn goedicheydt is so ^i† wijdt, als de Hemel is, ende dyne waerheydt so wijdt, als de wolcken gaen.

h Psalm. 103 b 11.

i† an. groot tot in de Hemelen etc. O God etce. ouer de Hemelen etc.

12

Verheft dy God ouer den Hemel, ende dyne eere ouer alle werelt.