Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den lvj. Psalm.

1. Een ghebet om verlossinghe wt den vare, daer hy in syner vlucht, 1.Sam. 21. inne was.

1

Een gulden kleynoodt Dauids, van der ^a stommen duyuen, onder de vreemde, ^b doe hen de Philisteen grepen te Gath.

a Dauid moeste als eene duyue stom zijn, dat is, stille swijgen, ende Koninck Saul niet verklaghen onder den Philisteen.

b 1.Sam. 21.b.11.

A.2

GOdt weest my ghenadich, ⁺ want menschen willen my versincken, daghelicx strijden sy ende beangstighen my.

+ Sauls hofghesinne veriaecht my in de ellende, ende ick moet ymmer in de vlucht leuen.

3

Myne vyanden versincken my daghelicx, want vele strijden teghen my stoutelick.

4

^c Wanneer ick my vreese, so hope ick op dy.

c Iosu. 1.a.5. Psalm. 118.a.6. Hebre. 13.a.

5

Ick wil Gods woordt roemen, op God wil ick hopen, ende my niet vreesen, wat soude my het vleesch doen?

6

Daghelicx vechten sy myne woorden aen, alle haer ghedachten zijn, dat sy my quaedt doen.

7

Sy houden te hoope ende loeren, ende hebben acht op myne verssenen, hoe sy mijn ziele grijpen.

8

^d Wat sy quaets doen, dat is schoon vergheuen: God stoote sulcke lieden sonder alle ghenaden tonder.

d Wat sy doen, dat is, aflaet. And. Meynen sy te ontkomen om harer boosheydt wille?

9

Telt myne vlucht, vaet myne tranen in dynen sack, sonder twijffel ^e du tellestse.

e Dat is, Du weest, hoe veel dier is, ende en vergheetstse niet.

B.10

Dan sullen hen myne vyanden moeten te rugghe keeren: wanneer ick roepe, so vermercke ick, dat du mijn God bist.

11

Ick wil roemen Godes woordt, ick wil roemen des Heeren woordt.

12

^f Op God hope ick, ende en vreese my niet, wat konnen my de menschen doen?

f Psalm. 118.a.6.

13

Ick hebbe dy God gheloeft, dat ick dy dancken wil.

14

^g Want du hebst myne ziele van den doot verlosset, myne voeten van slibberen, dat ick wandelen mach voor God, int licht der leuendigen.

g Psalm. 116.a.8.