Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den lv. Psalm.

1. Een ghebet onder den persoon Christi, teghen de Synagoge ende den verrader Iuda. Ende wort recht ghebruyckt teghen de valsche broeders, die met heftigen haet, dien sy dannoch met huychelsen ghelate behendich deckende, der Kercken aldermeeest schaden.

[fol. 187r]

A.1

Eene onderwijsinghe Dauids, voor te singhen op snarenspel.

2

GOd hoort mijn ghebet, ende verbercht dy niet voor mijn smeecken.

3

Merckt op my, ende verhoort my, hoe ick so klaghelick vertzaghe ende huyle.

4

Dat de vyandt so schreyt, ende de Godloose dringhet: want sy willen my eenen boosen tuck bewijsen, ende zijn my heftich ^a gram.

a Of, hatich, vyandisch.

5

Mijn herte beangstet hem in mynen lijue, ende des doodts vreese is op my gheuallen.

6

Vreesen ende beuen is my aenghekomen, ende grouwen heeft my oueruallen.

7

Ick sprack: O hadde ick vleughelen als de duyuen, dat ick vloghe, ende yewers blijuen konde.

8

Siet, so woude ick my verre wech maken, ende in de woestijne blijuen. Sela.

9

Ick woude haesten, dat ick ontliepe, voor den stormwindt ende onweder.

B.10

^b Maeckt hare tonghen oneens Heere, ende laetse ondergaen: want ick sie ^c wreuel ende twist in der stadt.

b Gene. 11.a.7.

c Of, moedtwillige onbillicheyt.

11

Sulckes gaet dach ende nacht om ende om in haren mueren: het is ^d moeyte ende arbeyt daerinne.

d Dat is, Enckel boosheyt, daermede sy hen ende andere beswaren.

12

Schade doen regeert daerin: lieghen ende bedrieghen laet niet af, van haren straten.

13

Wanneer my doch mijn vyandt schendede, woude ick het lijden: ende wanneer my mijn hater ouerpochte, woude ick my voor hem verbergen.

14

^e Du dannoch bist mijn gheselle, mijn pleger ende ^f bekende vriendt.

e Psalm. 38.b.12. Mich. 7.a.6.

f Of, ghewoonlicke.

15

Die wy vriendelick met malcanderen waren, tusschen ons: wy wandelden in den huyse Gods met hoopen.

16

^g De doot ^h verhaestse, ende moeten leuendich in de helle varen: want enckel boosheyt is onder hare hoopen.

g Num. 16.d.31.

h Of, oueruallese.

17

Ick dannoch wil tot God roepen, ende de Heere sal my helpen.

18

Des auonts, morgens ende middaechs, wil ick klagen ende huylen, so sal hy mijn stemme hooren.

19

Hy verlost mijn ziele van dien, die aen my willen, ende gheeft my ruste: want harer is vele teghen my.

C.20

God sal hooren ende haer verootmoedighen, die altoos blijft: Sela: want sy worden niet anders, ende en vreesen God niet.

21

Want sy leggen hare handen aen syne vreedsamen, ende ontheylighen zijn verbondt.

22

Haren mondt is glatter dan boter, ende hebben doch krijch in den sinne: hare woorden zijn saechter dan olye: ende zijn doch bloote sweerden.

23

ⁱ Werpt dynen aenligghenden noodt op den Heere, die sal dy versorghen, ende sal den rechtueerdighen niet eewichlick in onruste laten.

i Matth. 6.c.25. Luc. 12.c.22. 1.Pet. 5.a.7.

24

Doch God, du saltse onderwaerts stooten in de diepe kuyle: de bloedtghierighen ende valschen, sullen ⁺ hare leuen niet ter helfte brengen: ick daerenteghen, hope op dy.

+ Dat is, Watse voor hebben, noch te doen by haren leuen.