Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den liiij. Psalm.

1. Een gebet, dat hem God holpe wter vare daer hy door Braderie ingekomen was: ende zijn hier schoone troostingen, die ons in gelijcke varen een toeuerlaet maken, van onser hulpe ende beschuttinge, ende vander Kercken vyanden omkomen.

1

Een onderwijsinge Dauids, voor te singhen op snarenspelen.

2

^a Doe die van Siph quamen, ende spraken tot Saul: Dauid heeft hem by ons verborghen.

a 1.Sam. 23.b.19. ende. 26.a.1.

3

HElpt my God door dynen Name, ende doet my recht, door dijn ghewelt.

4

God verhoort mijn ghebet, verneemt de reden mijns monts.

5

Want ^b† stoute setten hen teghen my, ende ^c† trotzighe staen my na myner zielen, ende en hebben God niet voor ooghen. Sela.

b† An. vreemde, etc. ende schrickelicke staen, etc.

c† And. wreuelige, [dat is] moetwillighe.

6

Siet, God staet my by: de Heere ^d† weerhoudt mijn ziele.

d† And. is onder dien, die mijn ziele weerhouden.

7

^e Hy sal de boosheyt mynen vyanden betalen: verstoortse door dijn trouwe.

e Deuter. 32.d.35.

8

So wil ick dy een vreuchdenoffer doen, ende dynen Name Heere dancken, dat hy so troostelic is.

9

Want du ^f† helpest my wt alle myner noot, dat mijn ooghe aen mynen vyanden lust siet.

f† And. hy heeft my verlost vander helle, droeffenisse, ende mijn ooghe heeft ghesien [de wrake] op mijn vyanden.