Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den liij. Psalm.

1. Is ghelijcken inhoudts met den xiiij. Psalm.

A.1

Een onderwijsinge Dauids, ^a† int Choor, om malcanderen voor te singhen.

a† And. Op den Mahalath.

2

DE ^b dwasen spreken in harer herten: Daer en is gheen God: sy en deughen niets, ende zijn eenen grouwel in haren boosen wesen: daer en is niemant die wat goets doet.

b Psal. 14.a.1.

3

God sagh vanden Hemel op der menschen kinderen, dat hy saghe, oft yemant verstandich ware, die na God vraechde.

4

Doch sy zijn alle af gheuallen, ende altemael ondeuchdelick geworden: ^c daer en is niemandt die wat goets doet, oock niet eener.

c Rom. 3.b.10.

5

Willen dan de quaetdoenders hen niet seggen laten? die mijn volck verslinden, dat sy hen gheneeren? God en roepen sy niet aen.

6

Daer vreesen sy hen doch, daer niet te vreesen is: want God verstroyt de beenden der ^d drijuers, du maeckstse te schanden: want God versmaedtse.

d Dat zijn die, die met Wet ende ghewelt de lieden willen vroom maken, in haer eygen wercken: als de Hooftlieden het krijchsvolc drijuen

7

Ach dat de hulpe wt Zion ouer Israel quame, ende God zijn gheuangen volck verlossede: so soude hem Iacob verblijden, ende Israel vrolic zijn.