Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den lij. Psalm.

1. Desen Psalm veruaet een heftige ouerschuddinge ende bedreyghinge der tyrannen ende vyanden der Kercken, 8. vertroostet daerenteghen de gheloouighen met Gods hulpe ende hulde.

A.1

Een onderwijsinghe Dauids, voor te singen,

2

^a Doe Doeg de Edomiter quam, ende seyde het Saul aen, ende sprack: Dauid is in Abimelechs huys ghekomen.

a 1.Sam. 22.a.1.

3

VVat ^b† trotzstu dan, du Tyran, dat du kanst schade doen? so doch Gods goedertierenheyt noch daghelicx duert.

b† And. roemstu.

4

Dijn tonghe poocht na ^c schaden, ende snijdt met leughenen, als een scherp scheermes.

c Dat is, dat du anderen ongheluck toerichtest, ende schade doest.

5

Du spreeckst lieuer het boose dan het goede, ende lieuer valsch dan recht. Sela.

6

Du spreeckst gheerne alles wat tot verderuen dient, met valscher tonghen.

7

Daerom sal dy God oock ^d gantsch ende gaer verstooren ende verslaen, ende wt der hutten rucken, ende wt den lande der leuendigen wtroeyen. Sela.

d Uier plagen vertelt hy, Dat hi sal gheen huys ende gheen goet hehouden, daertoe in geen stadt noch in geenen lande blijuen.

8

Ende de rechtueerdige sullent sien, ende hen vreesen, ende sullen syner lachen.

9

Siet, dat is de man, die God niet voor synen troost en hiel, ^e maer verlaet hem op synen grooten rijcdom, ende was machtich schade te doen.

e Psalm 49.a.7. Luc. 12.b.19.

B.10

Ick daerentegen sal blijuen als eenen groenen olyboom, inden huyse Gods: verlate my op Gods goedertierenheyt, altoos ende eewichlick.

11

Ick dancke dy eewichlick, want du kanst het wel maken: ende wil ^f verbeyden op dynen Name, want dyne Heyligen hebben vreuchde daeraen.

f Of, bestaen,