Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den lj. Psalm.

1. Een sonderlinghe gebet van vergheuinge der sonden: ende is hier een beweeringe des vorighen Psalms: want in dien hy om der sonden vergiffenisse biddet, 17. Item, een lofoffer beloeft, gheeft hy klaerlicken te kennen, sy zy een geschenck, ende der barmherticheyt Gods eenich werck: leert seer dapper vander sonde grootheyt ende oorsake, daertoe van onser swackheyt teghen deselue.

A.1

Eenen Psalm Dauids, voor te singhen.

2

^a Doe de Propheet Nathan tot hem quam, als hy was tot BathSaba in ghegaen.

a 2.Sam. 12.a.1.

3

GOd ^b zijt my ghenadich na dyner goedertierenheyt: ende verdelcht myne sonden, na dyner grooter barmherticheyt.

b Psalm. 56.a.1.

4

Wascht my wel van myner misdaet, ende reynicht my van myner sonden.

5

^c (Want ick bekenne mijn misdaet, ende mijn sonde is alleweghen voor my.

c Hiob. 13.b.15. Psal. 32.a.5. Luc. 18.b.13. ende. 15.c.21.

6

Aen dy alleene hebbe ick ghesondicht, ende quaet voor dy gedaen:) op ^d dat du recht behoudest in dyne woorden, ende reyn blijuest, wanneer du gherichtet wordest.

d Roma. 3.a.4.

7

Siet, ick ben ^e† wt sondtlicken zade geboren, ende mijn moeder heeft my in sonden ontfangen.

e† And. in sonden gheboren.

8

Siet, du hebst lust ter waerheyt die int verborghen leyt: du laetst my weten de heymelicke wijsheyt.

9

^f Ontsondicht my met ysope, dat ick reyn worde: wascht my dat ick sneeu wit worde.

f Dat is, Absolueert my ende spreeckt my los: als in voortijden in de Wet door het sprengen met ysope, bediedt wert, Leuitic. 14.a.6. Nume. 19.a.6. Ephe. 5.c.26. 1.Pet. 3.c.21.

B.10

Laet my hooren vreuchde ende ^g vrolickheyt, dat de beenen vrolick worden, die du ^h† verslaghen hebst.

g Of, hertenlust,

h† And. ontwee gheslaghen.

11

Verbercht dijn aensicht van myne sonden, ende verdelcht alle myne misdaden.

12

Schept my God een reyn herte, ende gheeft my eenen nieuwen ⁱ ghewissen gheest.

i Dat is, Een gheest, die int gelooue sonder twijffel, ende der sake gewisse is, ende hen niet erren noch bewegen laet van menigerley waengedachten, leeren, etc. als dan de dunckelaers, ende twijffelers zijn. And. richtighen. Hesek. 36.c.26. Act. 2.a.4.

13

Verworpt my niet van dynen aensichte, ende neemt dynen Heylighen Gheest niet van my.

14

Troost my weder met dyner hulpe, ende de vrijmoedighe Gheest onthoude my.

15

Want ick wil den ouertreders dyne weghen leeren, dat hen de sondaers tot dy bekeeren.

15[16]

Verlost my vanden ^k bloetschuldigen, God die du mijn God ende ^l Heylandt bist: dat mijn tonghe dyne gherechticheyt roeme.

k Dat is, Uander schult daer ick den doot mede verdient hebbe: gelijc wy alle zijn voor God.

l Of, heylmaker, Salichmaker.

16[17]

Heere doet myne lippen op, dat mynen mont dynen roem verkondighe.

17[18]

^m Want du hebst niet lust ten offer: ick woude het dy anders wel geuen: ende brandtoffer en behaghen dy niet.

m Mich. 6.a.8.

19

De offerhanden die God behagen, zijn eenen ^n† beancxsten gheest: ^o een beancxstet ende verslagen herte, saltu God niet verachten.

n† An verknutzen

o Iesa. 66.a.2.

C.20

Doet wel by Zion na dyner genade, bouwet de mueren te Ierusalem.

21

Dan sullen dy behagen ^p de offerhanden der gherechticheyt, de brandofferen ende gantschen offer: dan salmen ossen op dynen Altaer offeren.

p Roma. 12.a.1.