Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den xlix. Psalm.

1. Een ghelijck inhoudt met den xxxvij. Psalm, want tis een vertroostinge tegen dese ergernisse, dat den Godloosen allenthaluen wel is, de Godsalighe daerentegen bekommert worden, 16. ende is hier een ghewisse plaetse vander Godsalighen opstandinghe ten eewigen leuen.

A.1

Eenen Psalm der kinderen Korah, voor te singen.

2

HOort toe alle volcken: merckt op alle, die ^a in deser tijt leeft.

a And. op Aerden woonet.

3

Beyde ghemeyne man ende heeren, beyde rijck ende arm met malcanderen.

4

Mynen mont sal van wijsheyt spreken, ende mijn herte van verstande segghen.

5

^b Wy willen een goede spreucke hooren, ende een fijn ghedichte op der harpen spelen.

b Psalm. 78.a.2. Matth. 13.d.35.

6

Waerom soude ick my vreesen in boose dagen, wanneer my de misdaet myner ^c† ouertreders my omringt?

c† And. verssenen omstaet? Sommige verlaten hen op, etc.

7

^d Die hen verlaten op haer goet, ende pochen op haren grooten rijckdom,

d Psalm. 52.a.9. Syrach 5.a.1. Luce. 12.b.19.

8

Doch kan een broeder niemanden verlossen, noch God yemant versoenen.

9

Want het kost te vele, haer ziele te verlossen, dat hy het moet laten aenstaen eewichlick.

B.10

Wanneer hy oock alreede ^e lange leeft, ende den kuyl niet en siet.

e Dat is, heeft eenen goeden moet, denckt nemmermeer aen den doot.

11

^f Want men sal sien, dat sulcke wijsen doch steruen, so wel als dwasen ende narren omkomen, ^* ende moeten haer goet anderen laten.

f Ecclesi. 2.b.14.b.16. ende. 3.b.18.

* Eccle. 11.b.10.

12

Dat is haer herte, dat hare ^g huysen altoos dueren, hare wooningen blijuen voort ende voort, ende hebben groote eere op Aerden.

g Dat is, hare geslachten, kinderen, ghesinne, etc. Syrach. 11.b.10.

13

Dannoch konnen sy niet blijuen in sulcker ^h weerde, maer moeten daer van, als een vee.

h Dat is, in goet ende eere.

14

Dit haer doen is enckel dwaesheyt, noch louent hare nakomelingen met haren monde. Sela.

15

Sy ligghen inder Hellen als schapen, de doot knaechtse, doch de ⁱ vrome sullen gantsch geringe ouer hen heerschen: ende haer ^k† pochen moet vergaen, inder Hellen moeten sy blijuen.

i Malach. 1.a.3.

k† And. gestalte

16

Doch God sal mijn ziele verlossen wter Hellen ghewelt, want hy heeft my aengenomen. Sela.

17

^l Laet dy niet verbijsteren oft eener rijck wort, oft de heerlicheyt zijns huys groot wort.

l Psalm. 37.a.1. Eccles 10.b.14.

18

^m Want hy en sal in synen steruen niets mede nemen, ende syne heerlicheyt sal hem niet na varen.

m Hiob. 1.c.21. ende. 27.b.19. 1.Timoth. 6.a.7. Syrach. 11.b.10.

19

Maer hy troost hem deses ⁿ goeden leuens, ende loeft het, wanneer eener na goede dagen ^o† poocht.

n Dat is, Hy houdet daer van, datmen hier genoech hebbe ende prale.

o† And. trachtet

C.20

So varen sy haren vaderen na, ende en sien het licht nemmermeer.

21

Summa: Wanneer de mensche inder weerdicheyt is, ende en heeft des gheen verstandt, so vaert hy daer van als een vee.