Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den xlviij. Psalm.

1. Is euen gelijcken inhoudts ende verstants met den xlvj. Psalm: want hy vertelt wat God voor weldaden bewesen hebbe synen volcke, in dien, dat hy Ierusalem oft de Kercke, ende synen dienst, voor menigherley aenloopen der vyanden, beschuttet ende beschermt heeft. Sodanighe exempelen maken ons oock eenen troost ende toeuersicht, God sal allewege zijn Kercke wel bewaren.

A.1

Eenen Psalm der kinderen Korah.

2

GOd is de Heere ende hooch beroemt, in der stadt onses Gods, op synen Heylighen berghe.

3

De berch Zion is als een schoon ^a spruytken, dies hem het gantsche lant troostet, aender zijden tegent Noorden, leyt de ^b stadt des grooten Konincx.

a An. landouwe dies hem etc. verbindt.

b Hebr. 12.c.22. Apoc. 21.a.2.b.10.

4

God is in hare palleysen bekent, dat hy de beschuttinghe zy.

5

^c Want siet, Koninghen zijn vergadert, ende met malcanderen voorby ghetoghen.

c Dat is, Koningen hebben voor deser stadt moeten verschricken, ende dicwils met schanden daervan trecken. 2.Par. 20.a.1

6

Sy hebben hen verwondert, doe sy sulcx sagen: sy hebben hen ontset, ende zijn ghestortet.

7

Beuinghe is hen aldaer aengekomen, angst als eener die baert.

8

Du verbrekest de schepen in de Zee, door den Oosten wint.

9

Als wy ghehoort hebben, so sien wy het aen der stadt des Heeren Zebaoth, aender stadt onses Gods: God onderhout deselue eewichlic. Sela.

B.10

God wy verwachten dyner goedertierenheyt, in dynen Tempel.

11

God, als dynen Name, so is oock dynen roem, tot aender werelt eynde: dyne rechterhant is vol gherechticheyts.

12

^d Den berch Zion verblijde hem, ende de dochteren Iuda zijn vrolick, om dyner rechten wille.

d Psalm. 97.a.8.

13

Maeckt v om Zion, ende omuangtse, ende telt hare torrens.

14

Legt neersticheyt aen hare mueren, ende verhoocht hare palleysen, op datmen daer van ^e verkondighe by den nakomelinghen.

e Dat is, prediken moghen Gods woort.

15

Dat dese God zy onse God altoos ende eewichlick: hy voert ons ^{f †} als de ieucht.

f Dat is, ghenadichlic ende saechtmoedich door het woort der ghenaden, als vader ende moeder hare kinderen opbrengen: niet als henckers ende stockmeesters, door Wetten ende bedwanck, drijuen ende worghen.

† And. tot inden doot.