Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den xliiij. Psalm.

1. Een ghebet der Kercken tegen der tyrannen woedighe veruolgingen: want so bediedet Paulus Rom. 8. Ende wort hedensdaechs wel ghebeden, niet alleen tegen die, die Gods woort haten ende veruolghen, maer oock teghen den Turck. Uoor aen is een vertellinge der vorigher verlossinge, 10. daer na een klage, dat hen deselue so niet laten speuren byden teghenwoordigen tijden, 23. ende biddet God woude om zijns woorts wille helpen.

A.1

Een onderwijsinge der kinderen Korah, voor te singhen.

2

GOd, ^a wy hebben met onse ooren ghehoort, ^b onse vaders hebbent ons vertelt, wat du gedaen hebst te haren tijden, van oudts herwaerts.

a 1.Sam. 17.a.1. 2.Sam. 8.a.1.

b Deute. 6.a.7.

3

Du hebst met dyner handt de Heydenen verdreuen, daerenteghen hen hebstu inghesettet: du hebst de volcken verdoruen, daerenteghen hen hebstu wtghebreydet.

4

^c Want sy hebben het lant niet ingenomen door haer sweert, ende haren arm en holp hen niet: maer dyne rechterhant, dynen arm, ende het licht dijns aensichts: want du haddest welgeuallen aen hen.

c Deuter. 4.a.1.

5

^d God, du bist deselue mijn Koninck, du die Iacob hulpe toesegst.

d Psalm. 97.a.1.

6

Door dy willen wy onse vyanden ontwee stooten: ^e in dynen Name willen wy ondertreden, die hen teghen ons setten.

e Psalm. 118.b.10.

7

Want ick en verlate my niet op mynen boge, ende mijn sweert en kan my niet helpen.

8

Maer du helpest ons van onsen vyanden, ende makest te schanden die ons haten.

9

Wy willen daghelicx roemen van God, ende dynen Name dancken eewichlick. Sela.

B.10

Waerom verstootstu ons dan nu, ende laetst ons te schanden worden? ende en treckest niet wt onder onsen heyre?

11

Du laetst ons vlieden voor onse vyanden, dat ons beroouen, die ons haten.

12

^f Du laetst ons op eten als schapen, ende verstroyest ons onder de Heydenen.

f Iesa. 53.a.6.

13

Du verkoopst dijn volck ^g om niet, ende en ^h† nemest niets daer voor.

g Dat is, sonder ghewin.

h† And. laest hare weerderinge niet verhooghen.

[fol. 185v]

14

ⁱ Du makest ons ter versmaetheyt onsen nabueren, een spotte ende hoon, dien die rondtom ons zijn.

i Psalm. 79.a.4. 31.b.12.

15

^k Du makest ons tot eener byspreucke onder den Heydenen, ende dat de volcken het hooft ouer ons schudden.

k 1.Reg. 9.a.7.

16

Daghelicx is mijn versmaedtheydt voor my, ende mijn aensicht is vol schanden.

17

Dat ick de schenders ende lasteraers hooren, ende de vyanden ende wraeckgierigen sien moet.

18

Dit alles is ouer ons gekomen, ende hebben doch dyner niet vergheten, noch ontrouwelick in dynen Verbonde ghehandelt.

19

Onse herte en is niet afgeuallen, noch onsen ganck gheweken van dynen weghe.

C.20

Dat du ons also ^l† slaest onder de ^m Draken ende bedeckest ons met duysternisse.

l† And. verstootest onder de, etc.

m Dat is, den vergiftigen tyrannen: ende duysternisse heet ongheluck.

21

Wanneer wy des Naems onses Gods vergeten hadden, ende onse handen opgheheuen, tot eenen vreemden God:

22

Dat konde God wel vinden: ⁿ nu kent hy ymmers onses herten gront.

n Psalm. 7.b.10. Ierem. 17.b.10.

23

^o Want wy worden doch om ^p dynent wille, dagelicx verworcht, ende zijn geacht als slachtschapen.

o Roma. 8.d.36. 4.Esd. 15.b.10.

p Dat is, Niet om onsen wille, maer dijn woort veruolghen zy in ons.

24

^q Ontweckt dy Heere: waeromme slaepstu? waect op, ende en verstoot ons niet so gantschelic.

q Psalm. 89.e.47

25

Waerom verberchstu dijn aensicht: vergetest onser ellenden ende benautheyts?

26

^r Want onse ziele is ghebuycht ter Aerden, onsen buyck kleeft aenden Aertbodem.

r Psalm. 119.c.25.

27

Maeckt dy op, helpt ons, ende verlost ons, om dyner goedertierenheyt wille.