Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den xliij. Psalm.

1. Een gebet van gelijcken verstande met den voorgaenden: ende dese Psalmen zijn misschien ghedichtet van Dauid, doe hy voor Absalom, huys ende tempel deruen moeste buytens lants.

A.1

RIcht my God, ende voert mijn sake, tegen het onheylige volck, ende verlost my van den valschen ende boosen lieden.

2

Want du bist de God myner stercte: waerom verstootstu my? ^a waerom laetstu my so treurich gaen, wanneer my mijn vyant dringt?

a Psalm. 42.b.10

3

Seyndt dijn licht ende dyne waerheyt, dat sy my leyden, ende brenghen tot dynen Heyligen berghe, ende tot dyner wooninghe.

4

Dat ick ingae, tot den ^b Altaer Gods: tot den God, die mijn vreuchde ende hertenlust is, ende dy God op der harpen dancke, mijn God.

b Esai. 56.a.7. Hebr. 13.b.10.

5

^c Wat bedroefstu dy mijn ziele, ende bist so onrustich in my: wacht op God: want ic sal hem noch dancken, dat hy mijns aensichts hulpe ende God is.

c Psalm. 42.a.6. b.12.