Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den xlj. Psalm.

1. Desen Psalm hoort oock tot den persoon Christi, die daer biddet om verlossinghe teghen de aenslagen der Synagogen. 13. Ende is hier een opentlicke Prophecie van de opstandinghe Christi, 5. die hemseluen hier oock sondaer noemt, daerom dat hy hemseluen aen onse stede gheset, ende voor onse sonden voldaen heeft. Wort bediedt van Christo. Ioan. 13. so kan het dan op Dauid, na de dwalinge der onbesinden Ioden niet getogen worden.

A.1

Eenen Psalm Dauids, voor te singhen.

2

VVel dien, ^a die hem des nootdruftigen aenneemt: dien sal de Heere verlossen inder booser tijt.

a Roma. 12.b.13. Syrach. 7.d.35. ende 12.a.8. Galat. 6.b.10.

3

De Heere sal hem bewaren, ende by den leuen behouden, ende hem laten wel gaen op Aerden, ende hem niet gheuen, in syner vyanden wille.

4

De Heere sal hem verquicken op het bedde syner kranckheyt: du helpest hem van alle syner kranckheyt.

5

^b Ick sprack: Heere, zijt my ghenadich: heelt mijn ziele, ^c want ick hebbe aen dy ghesondicht.

b Syrach. 21.a.1.

c Psalm. 51.a.6.

6

Mijn vyanden spreken quaet tegen my: wanneer sal hy steruen, ende synen naem vergaen?

7

Sy komen dat sy aenschouwen, ende meynen het doch niet van herten, maer soecken wat, dat sy lasteren moghen: gaen henen, ende dragent wt.

8

Alle die my haten, ^d mummelen te samen teghen my, ende dencken quaet ouer my.

d Of, ruymen

9

Sy hebben een boeuenstuck ouer my besloten, wanneer hy leyt, en sal hy niet weder opstaen.

B.10

^e Oock mijn vrient, dien ick vertroude, die mijn broot att, treedt my onder de voeten.

e Ioan. 13.b.18. Matth. 26.c.21. Luc. 22.c.21. Act. 1.b.17.

11

Du dannoch Heere weest my genadich, ende helpt my op, so wil ickse betalen.

12

Daer by mercke ic, dat du een welgeuallen aen my hebst, dat mijn vyant niet ouer my iuychen sal.

13

My doch weerhoudestu om myner vromicheyt wille, ende stellest my voor dijn aensichte eewichlick.

14

Gheloeft zy de Heere de God Israels, van nu aen, tot in eewicheyt. Amen, Amen.