Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Psalm. xxxix.

1. Stelt hem tweerley erghernisse voor: zijn ellende, ende der Godloose voorspoet, ende sterckt hem teghen beyde. 5. bidt daer na, dat hem God voor der Godloosen sekerheyt beware, 9. ende van sonden ende der sonden straffe verlosse.

A.1

Eenen Psalm Dauids, voor te singhen, voor ^a Ieduthun.

a 1.Paral. 16.d.38 ende. 25.a.1.

2

ICk hebbe my voorgesettet, ick wil my hoeden, dat ick niet en sondige met myner tonghen: ick wil mynen mont ^b toomen, dewijle ick den Godloosen also voor my sien moet.

b Dat is, Dat ick niet murmurere, dewijle het my so qualick, ende den boosen so wel gaet.

3

Ick ben verstommet ende stille gheworden, ende ^c swijghe der vreuchden, ende moet mijn leet in my eten.

c Dat is, Het en is my niet lacherlic.

4

Mijn herte is ontbrant in mynen lijue, ende wanneer ick daer aen ghedencke, worde ick ontfunckt, ick spreke met myner tonghen.

5

^d Dannoch Heere ^e leert my doch, dat het een eynde met my hebben moet, ende dat mijn leuen een merckteecken heeft, ende ick daeruan moet.

d Psalm. 90.b.10. ende. 119.

e Dat is, Dat ick niet so seker en leue, als de Godloosen, die gheen ander leuen verhopen.

6

^f Siet, myne dagen zijn eener hant breedt by dy, ende mijn leuen is als niets voor dy: hoe gantsch niets zijn alle menschen, die doch so seker leuen. Sela.

f Iob. 7 a 6. ende 8.a.9.

7

Sy gaen daerhenen als een schaduwe, ende maken hen veel onnutter onrusten: ^g sy vergaderen, ende en weten niet wie het krijghen sal.

g Luce. 12.c.20.

8

Nu Heere, wes sal ick my troosten? ick hope op dy.

9

Verlost my van alle myner sonden, ende laet my niet den sotten eenen spot worden.

B.10

Ick wil ^h swijgen, ende mynen mont niet op doen: du salt het wel maken.

h Dat is, Ick wilse laten varen, ende niet murmureren teghen dy.

11

Wendt dyne plage van my: want ick ben versmacht voor de straffe dyner handt.

12

Wanneer du eenen castijdest om der sonden wille, so wort syne schoonheyt verteert als van motten: ⁱ ach hoe gantsch niets zijn doch alle menschen. Sela.

i Psalm. 62.b.10.

13

Hoort mijn ghebet Heere, ende verneemt mijn schreyen, ende en swijcht niet ouer myne tranen: ^k want ick ben beyde dijn pelgrim ende dijn borgher, als alle myne vaders.

k 2.Para. 30.b.15. Heb. 11.b.13.

14

Laet af van my, dat ick my verquicke, eer ick dan henen vare, ende niet meer hier en zy.