Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den xxxviij. Psalm.

1. Een ghebet tegen de sonde ende boose consciencie: ende wort hier een kostelicke leere ende voorbeelt ghegeuen, datmen inden aengrijp des toorns Gods ende zijns gherichts, met vaster hope aen syne barmherticheyt sal houden, ende hem tot vlijtighe ghebeden begheuen.

A.1

Eenen Psalm Dauids ter ^a ghedachtenisse.

a God louen, ende hemseluen beschuldigen, dat is, recht aen God ende hemseluen ghedacht.

2

HEere, ^b straft my niet in dynen toorne, ende castijdt my niet in dyner grimmicheyt.

b Ierem. 10.c.24. Psalm. 6.a.2.

3

Want dyne pijlen steken in my, ende dyne hant drucket my.

4

Daer en is niet ghesondts aen mynen lijue, voor dynen dreyghen, ende daer en is gheenen vrede in mijn ghebeenten, voor myne sonden.

5

Want myne sonden gaen ouer mijn hooft, als eenen swaren last zijn sy my te swaer geworden.

[fol. 184v]

6

Myne wonden stincken ende vloeyen van etter, om myner dwaesheyt wille.

7

Ick gae krom ende seer gebucket, den gantschen dach gae ick treurich.

8

Want myne ^c† lendenen verdorren gantsch, ende daer en is niets ghesondes aen mynen lijue.

c† And. dgyen, of heupen

9

Het is met my gantsch anders geworden, ende ben seer ontween ghestooten: ick huyle van onruste mijns herten.

B.10

Heere voor dy is alle mijn begeeren, ende mijn suchten is dy niet verborghen.

11

Mijn herte beeft, mijn kracht heeft my verlaten, ende ^d het licht myner ooghen en is niet by my.

d Dat is, mijn aengesicht en is niet licht ende vrolic, maer siet suer, bedroeft ende duyster.

12

^e Myne beminden ende vrienden staen teghen my, ende sien mijn plaghe, ende myne naesten, treden verre af.

e Iob. 19.b.13. Psalm. 55.b.14. ende. 88.a.9.

13

Ende die na mijnder zielen staen, stellen my na: ende die my quaet willen, spreken hoe sy schade doen willen, ende gaen met enckel list omme.

14

Ick doch moet zijn als eenen doouen, ende niet hooren, ende als een stomme, die synen mont niet op en doet.

15

Ende moet zijn, als een die niet en hoort, ende die gheen wederreden in synen mont en heeft.

16

Doch ick ^f volharde Heere op dy: du Heere mijn God, salt my verhooren.

f Of, veste.

17

Want ick dencke, dat sy doch haer niet ouer my en verblijden: wanneer mynen voet slibberde, souden sy hen hooch roemen teghen my.

18

Want ick ben tot lijden ghemaeckt, ende mijn smerte is ghestadelick voor my.

19

Want ick doe myne misdaet kondt, ende sorghe voor myne sonden.

C.20

Doch myne vyanden leuen, ende zijn machtich: ^g die my sonder schuldt haten, zijn groot.

g Psalm. 69.a.5. ende 35.b.19.

21

^h Ende die my quaet doen voor het goede, setten hen tegen my, daerom dat ick ouer het goede houde.

h Psalm. 35.b.12. ende 109.a.5.

22

Verlaet my niet, Heere mijn God: weest niet verre van my.

23

Haest dy, my by te staen, Heere, mijn hulpe.