Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den xxxvij. Psalm.

1. Eene schoone verstroostinge teghen de erghernisse der Godsalighen, daer sy by wijlen mede worden aengheuochten: wanneer sy sien, dat sy, als van Gode verlaten, de Godloosen daerentegen met alderley voorspoet ende gheluck ouerschuddet worden. ⁺ Worden derhaluen hier vermaent tot gedult, dat sy daerom niet vertzagen, noch ghener exempel met sonden nauolghen. Ende dat hier de vermaninghen ende vertroostinghen so dicwils verhaelt worden, daer verthoont de Heylige Gheest in, hoe wy van aerde wraeckghierich zijn, ende daeromme wel behoeuen, dat ons sulck beuel des ghedults altijts inghedrucket werde.

+ Dese spreucke, Salich zijn de saechtmoedighe: want sy sullen het aertdtrijcke besitten: is een glose ende wtduydinge deses Psalms, Matth. 5.a.5.

A.1

Eenen Psalm Dauids. Aleph. VErtoornt ^a dy niet ouer de boose: weest niet nijdich ouer de quaetdoenders.

a Prou. 23.b.17. ende 24.a.1.

2

^b Want als het gras, worden sy haest afghehouwen, ende als het groene kruyt, sullen sy verwelcken.

b Psalm. 129.a.6. 2.Reg. 19.c.26.

3

Beth. Hoept op den Heere, ende doet het goede: ^c blijft inden lande, ende geneert dy ^d redelick.

c Deute. 4.a.1. ende. 5.d.33.

d Dat is, met God ende met eeren: dat du God vreesest, ende niemanden onrecht doest.

4

Hebt dynen lust inden Heere: die sal dy geuen, wat dijn herte wenscht.

5

Gimel. ^e Beueelt den Heere dyne wegen, ende hoept op hem, hy salt wel maken.

e Hiob. 13.b.15. Prouer. 16.a.3.

6

^* Ende sal dyne gherechticheyt voortbrengen, als het licht, ende dijn recht als den middach.

* Iesa. 58.a.8. Iob. 11.b.17.

7

Daleth. ^f Weest stille den Heere, ende ^g wacht op hem: vertoornt dy niet ouer dien, die synen moetwille gheluckelick voortgaet.

f Dat is, vertoeft, verbeydt, ende en woedet niet.

g Of, houdt wacht, verwacht

8

He. Staet af van toorne, ende verlaet de grimmicheyt: vertoornt dy niet, dat du oock quaet doest.

9

^h Want de boose worden wtgheroeyt: die daerentegen des Heeren verwachten, sullen het lant beeruen.

h Prouer. 2.b.12. Iob. 18.b.17.

B.10

Vau. Het is noch om een kleyne tijt, so is de Godloose niet meer: ⁱ ende wanneer du na syner stede sien salt, sal hy wech zijn.

i Iob. 7.c.21. Psalm. 37.d.36.

11

^k Daerenteghen de ellendighe sullen het lant beeruen, ende lust hebben in grooten vrede.

k Matth. 5.a.5.

12

Zain. De Godloose ^l† dreycht den rechtueerdighen, ^* ende bijt syne tanden tsamen ouer hem.

l† And. stellet den etc. na.

* Psalm. 112.b.10. 59.a.9.

13

^m Doch de Heere lachet syner: want hy siet, dat synen dach koemt.

m Psalm. 2.a.4. Prouer. 1.b.16.

14

Keth. De Godloosen trecken het sweert wt, ende spannen haren boge, dat sy vellen den ellendighen ende armen, ende slachten de vrome.

15

Doch haer sweert sal in haer herte gaen, ende haren boghe sal verbreken.

16

Teth. ⁿ Het weynighe, dat een rechtueerdighe heeft, is beter, dan het groote goet veler Godloosen.

n Prouer. 15.b.16 Syrac. 29.c.29. 1 Timot. 6.a.8.

17

^o Want der Godloosen arm sal verbreken: daerentegen de Heere onthoudt de rechtueerdighe.

o Psal. 10.b.15.

18

Iod. De Heere kent de dagen der vromen, ende haer goet sal eewichlick blijuen.

19

Sy en worden niet te schanden in der booser tijt, ^p ende in den dieren tijt sullen sy ghenoech hebben.

p Psalm. 34.b.11.

C.20

Caph. ^q Want de Godloosen sullen omkomen, ende de vyanden des ^r† Heeren: wanneer sy oock alreede zijn als een kostelicke landouwe, so ^s sullen sy doch vergaen, als den roock vergaet.

q Psalm. 92.b.10. Prouerb. 12.a.7.

r† And. Heeren sullen als rammen vet verteert worden, als den rooc sullen sy verswinden.

s Psalm. 68.a.3.

21

Lamed. ^t De Godloose borcht, ende en betaelt niet: de rechtueerdighe daerenteghen is barmhertich ende mildt.

t Psalm. 112.a.5. Luc. 6.d.35.

22

Want syne gesegende beeruen het lant: daerenteghen syne veruloeckeden, worden wtgheroeyt.

23

Mem. Van den Heere wordt sulcx mans ganck gheuordert, ende heeft lust aen synen wech.

24

^u Valt hy, so wort hy niet wech gheworpen, want de Heere houdt hem by der hant.

u Prou. 24.b.16. Psalm. 34.c.20. ende. 145.b.14.

25

Nun. ^x Ick ben ionck gheweest, ende oudt gheworden: ende en hebbe noch noyt ghesien den rechtueerdigen verlaten, ofte zijn zaet om broot gaen.

x Syrac. 2.b.12. 1.Reg. 17.a.4.

26

^y Hy is alle tijt barmhertich ende leenet geerne, ende zijn zaet wort gheseghent.

y Psal. 112.a.5.9. Prouer. 11.b.17.

27

Samech. ^z Laet van den boosen, ende doet het goede, ende blijft altoos.

z Psalm. 34.b.15. Amos. 5.b.15.

28

Want de Heere heeft het recht lief, ^a ende en verlaet syne Heyligen niet, eewichlick worden sy bewaert: doch der Godloosen zaet wort wtgheroeyt.

a Hebr. 13.a.5. Iosue. 1.a.5.

29

Ayn. ^b De rechtueerdige beeruen het lant, ende blijuen eewichlick daerinne.

b Pro. 2.c.24.

D.30

Phe. ^c Den mont des rechtueerdigen spreect de wijsheyt, ende zijn tonghe leert het recht.

c Deuter. 31.a.6. Prouer. 31.a.6.

31

^d De Wet zijns Gods is in zijn herte: syne treden en slibberen niet.

d Iesa. 51.a.7.

32

Zade. ^e De Godloose loeret op den rechtueerdigen, ende dencket hem te dooden.

e Ierem. 9.a.8. Psalm. 10.a.9. Sapien. 2.b.12.

33

Doch de Heere en laet hem niet in synen handen, ende en verdoemt hem niet, wanneer hy veroordeelt wort.

34

Coph. Wacht op den Heere, ende houdt synen wech: so sal hy dy verhooghen, dat du het lant beeruest, du salt het sien, dat de Godloosen wtgheroeyt worden.

35

Resch. ^f Ick hebbe ghesien eenen Godloosen, die was stoutmoedich, ende breydde hem wt, ende groendde, als eenen lauwerboom.

f Psalm. 92.a.8. Iob. 20.a.6.

36

^g Doemen voorby ghinck, siet, doe was hy wech: ^h ick vraechde na hem, doe werdt hy nerghens gheuonden.

g 1.Thess. 5.a.3.

h Iob. 7.c.21. Psalm. 37.b.10.

37

Sin. Blijft vroom, ende houdt dy recht: want sulcken sal het ten laetsten wel gaen.

38

ⁱ De ouertreders daerenteghen worden verdelghet met malcanderen, ende de Godloosen worden ten laetsten wtgheroeyt.

i Iob. 8.c.22.

39

Tau. Doch de Heere helpt den rechtueerdighen: die is hare sterckte inder noot.

40

Want de Heere sal hen bystaen, ^k ende salse verlossen: hy salse vanden Godloosen verlossen, ende hen helpen: want sy vertrouwen op hem.

k Iob. 36.b.13.