Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Psalm. xxxvi.

1. Troostet de vroomen teghen het rasen der Godloosen, die hy seer fijn afmalet. 10. aent eynde biddet hy dat hem God inden woorde, voor den Godloosen ende hare listighe aenslaghen, beware.

A.1

Eenen Psalm Dauids des Heeren knecht, voor te singhen. HEt is ^a van gront mijns herten, van der Godloosen weghen ghesproken, Dat gheen Gods vreese by hen is.

a Dat is, wanneer ick grondelick de waerheyt seggen sal, Want de Godloosen schijnen als waren sy vroom ende heylich, ende is toch inden gront valsch.

2

Sy ^b vercieren hen onder malcanderen selue, dat sy haer boose sake vorderen, ende andere ^c veronglimpen.

b Dat is, optoyen.

c Dat is, onschijnich, hatelic maken

3

Alle haer leere is schadelick ende gheloghen, ^d sy en laten hen ooc niet wijsen, dat sy wat goets deden.

d Syr. 21.a.7. b.14

4

Sy dencken ^e op haren leger na schade, ende staen vast op den boosen wech, ende en schuywen gheen erch.

e Dat is, sonder ophouden, en rusten sy niet.

5

^f Heere, dyne ^g goetheyt reyct so wijdt als den Hemel is, ende dyne waerheydt, so wijdt als de wolcken gaen.

f Deuter. 4.b.19. Matth. 5.e.45.

g Of, goedertierenheyt.

6

Dyne gherechticheydt staet als ^h de berghen Gods, ende dijn recht als groote diepte: ⁱ Heere, du helpest beyde den mensche ende vee.

h Dat is, vaste ende onuerstoorlick,

i Esaie. 30.c.23.

[fol. 184r]

7

Hoe dierbaer is dyne goedertierenheyt, God, dat de menschen kinderen, onder de schaduwe dyner vleughelen vertrouwen.

8

Sy worden droncken van de rijcke goederen dijns huys, ende du drenckestse met wellust, als met eenen stroom.

9

^k Want by dy is de leuendighe ^l fonteyne, ende in dynen lichte sien wy het ^m licht.

k Ierem. 2.b.13.

l Of, springhende wateradere.

m Dat is, troost, vreuchde.

B.10

Breydt dyne goedertierenheyt ouer die, die dy kennen, ende dyne gerechticheyt ouer de vromen.

11

Laet my niet vanden stouten ondertreden worden, ende de hant der Godloosen ⁿ storte my niet.

n Of, velle.

12

^m† Maer laet sy, de quaetdoenders, aldaer vallen, dat sy verstooten worden, ende niet blijuen moghen.

m† And. daer zijn gheuallen die ongerechticheit doen, sy zijn af gheworpen gheweest, ende sy en zijn niet konnen weder opgericht worden.