Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den xxxiiij. Psalm.

1. Is ghelijck en inhoudts, met den vorigen Psalme: is oock met lieuelicken vermaningen ondermengt, ende met schoonen vertroostinghen, dat de Heyligen hoewel hier beangstet ende benauwet, dannoch by Gode in gestadigher achtinghe zijn, etc. ende Dauid heeft hem ghedichtet, doe hy in vare was by Abimelech, dat is Achis. 1.Samue.21.

1

Eenen Psalm Dauids, ^a doe hy zijn ghebaer veranderde voor Abimelech, die hem van hem dreef, ende hy wech ghinck.

a 1.Sam. 21.a.2. b.10.

A.2

Aleph. ICk wil den Heere louen alle tijt: synen lof sal altoos in mynen mont zijn.

3

Beth. Mijn ziele sal haer beroemen des Heeren, dat het de ellendighe hooren, ende hen verblijden.

4

Gimel. Prijset met my den Heere, ende laet ons met malcanderen synen Naem verhoogen.

5

Daleth. Doe ^b ick den Heere sochte, antwoordde hy my, ende verlossede my wt alle mynen vreesen.

b 1.Sam. 30.a.7. Psalm. 22.c.25.

6

Vau, He. Die hem aensien ^c† ende ^d aenloopen, dier aengesicht sal niet te schanden worden.

c† And. werden verlichtet: haer aengesichte, etc.

d Dat is, Die hem dringen, als wouden sy hem oueruallen, gelijck als de gijlende vrouwe den Richter, Luc. 18. Oft, ghelijck als wateren daerhenen vlieten met hoopen ende stormen: want hy heeft het geernr, datmen soecke, aenkloppe ende buldere, met bidden sonder af laten.

7

Zain. Doe ^e dese ellendighe riep, hoorde de Heere, ende halp hem wt alle synen nooden.

e Psalm. 91.b.11. 2.Reg. 6.b.17. ende. 19.d.35.

[fol. 183v]

8

Heth. ^f De Engel des Heeren leghert hem rontom dien, die hem vreesen, ende helpt hen wt.

f 2.Reg. 6.b.17. ende 19.d.35. Iosue. 5.b.14.

9

Thet. ^g Smaeckt ende siet, hoe vriendelick de Heere is: wel dien, die op hem betrouwet.

g Psalm. 25.a.2. 1.Petr. 2.a.3.

B.10

Iod. ^h Vreest den Heere ghy syne Heyligen: want die hem vreesen, en hebben gheen gebreck.

h Psalm. 1. 8.a.2.

11

Caph. ⁱ De rijcke moeten nootdurftich zijn ende hongheren: ^k daerenteghen die den Heere soecken, hebben gheen ghebreck aen eenighen goede.

i Hebr. leeuwen

k Gene. 31.e.42. Psalm. 33.b.19. ende. 37.b.19. Matth. 6.d.33.

12

Lamed. Koemt herwaerts kinderen, hoort my toe: ick wil v de vreese des Heeren leeren.

13

Mem. ^l Wie isset, die een goet leuen begheert? ende die gheerne goede daghen hadde?

l 1.Pet. 3.b.10.

14

Nun. ^m Behoedt dijn tonghe voor den boosen, ende dyne lippen dat sy gheen bedriegherie en spreken.

m Dat is, Uermijde valsche leere, ende doe wat goets, ende lijdt dy

15

Samech. Laet af van het boose, ende doet het goede: soeckt vrede ende iaecht hem na.

16

Aijn. ⁿ De ooghen des Heeren sien op de rechtueerdige, ende zijn oorden op haer schreyen.

n Syrac. 15.c.20.

17

Phe. Het aensicht daerenteghen des Heeren staet ouer die, die quaet doen, dat hy hare ghedachtenisse ^o wtroeye vander Aerden.

o Dat is, Datmen niet meer van hen en houdt.

18

Zade. Wanneer de [rechtueerdighe] roepen, so hooret de Heere, ende verlostse wt alle haren noot.

19

Coph. De Heere is na by dien, die eens gebroken herten zijn: ende helpet dien, die ^p een verslaghen ghemoet hebben.

p Psalm. 51.b.19. Iesa. 57.b.15. ende. 61.a.3. ende. 66.a.2.

C.20

Resch. ^q De rechtueerdige moet vele lijden: doch de Heere helpt hem wt dien allen.

q Prouer. 24.b.16 2.Timo. 3.b.12.

21

Sin. Hy bewaert hem alle zijn ghebeente, dat daer niet een ghebroken en wort.

22

Tau. Den Godloosen sal het ongheluck dooden: ende die den rechtueerdighen haten, sullen ^r schult hebben.

r Dat is, omghebracht worden als quaetdoenders.

23

Phe. De Heere verlosset de zielen syner knechten: ende alle die op hem vertrouwen en sullen gheen schult hebben.