Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den xiiij. Psalm.

1. Een prophecie van der Ioden Godloosheydt op de tijden Christi: derhaluen hy aent eynde begeert, dat Christus een verbeterder ende veranderder sulcker Godloosheydt, door de leere zijns Euangelij ghesonden worde. Paulus bediedt dit int gemeyn, dat de gantsche natuere, sonder den Gheest Gods, door de sonden verdoruen zy.

A.1

Eenen Psalm Dauids, voor te singhen. DE ^{a *} dwasen spreken in harer herten: Daer en is gheen God: sy en dueghen niets, ende zijn eenen grouwel in haren wesen: daer en is niet een, die wat goets doet.

a Psalm. 53.a.2.

* Dwasen heet hy roeckeloose lieden, die na God niet en vraghen.

2

^b De Heere sach van den Hemel op der menschen kinderen, ^c dat hy saghe, oft yemandt verstandich ware, ende na God vraechde.

b Gene. 11.a.5. ende 18.c.21.

c Roman. 3.b.10.

3

Doch sy zijn alle afgheweken, ende alle met malcanderen ondeuchdelick: daer en is niemant die wat goets doet, oock niet eener.

4

Wil dan niemant ^d† van den quaetdoenders dat mercken? die mijn volc verslinden, dat sy hen gheneren: doch den Heere en roepen sy niet aen.

d† And. niet mercken, dat sy alle quaetdoenders zijn, ende mijn volc euen als het broot vreten [of opeten] ende den Heere niet aen en roepen?

5

^e Aldaer vreesen sy hen: doch God is by den gheslachte der rechtueerdighen.

e God vreesen sy niet: anders vreesen sy allerley, als den buyck, het broot, goet, eere, baerlicheyt, doot.

6

Ghy schendet des armen raedt: doch God is zijn toeuersicht.

7

^f Och, dat de hulpe wt Zion ouer Israel quame, ende de Heere zijn gheuanghen volck verlossede: so soude Iacob vrolick zijn, ende Israel hem verblijden.

f Esaie 59.c.20. Roma. 11.c.26.