Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den vij. Psalm.

1. Biddet met ontslach onbillicker veruolginghe Sauls, 7. in zijn beloefde Rijcke ghesettet te worden, 10. ende dat syne vyanden, (13. welcker straffe hy op toeuersicht Godlicker rechtueerdicheydt, voorleyt, 18. ende daer voor den Heere danckt,) tot schanden werden.

A.1

De ^a† onschuldt Dauids, daer hy van sanck den Heere, ^* van wegen der woorden des Mooren des Ieminiten.

a† and. onwetenheyt

* 1.Samu. 16.a.7

2

OP ^b dy Heere betrouwe ick, mijn God, helpt my ^c van alle myne veruolghers, ende verlost my.

b Psalm. 25.a.1. ende 31.a.1. ende 71.a.1.

c 1.Reg. 19.b.19. ende 24.c.26.

3

Dat sy niet als Leeuwen mijn ziele en grijpen, ende verscheuren, dewijle daer gheen Verlosser en is.

4

Heere mijn God, hebbe ick sulcx ghedaen, ende is onrecht in mynen handen.

5

Hebbe ick quaet vergolden dien, die vreedtsaem met my leefden: oft die, welcke my sonder oorsake vyandt waren, beschadicht:

6

So veruolghe mijn vyandt mijn ziele, ende grijpese, ende trede mijn leuen te gronde, ende legghe mijn eere in het stof. Sela.

7

Staet op Heere in dynen toorne: verheft dy ouer de grimmicheydt myner vyanden, ende ^d† helpt my weder in het Ampt, dat du my beuolen hebst.

d† And. waeckt voor my inden gerichte, dat du geordineert hebst.

8

Dat hen de lieden weder tot dy vergaderen: ende om derseluen wille koemt weder bouen.

9

^e De Heere is Richter ouer de lieden: richt my, Heere, na myner gherechticheydt ende vromicheydt.

e Dat is: Niet ick, noch yemant, maer God selfs alleen, regeert ouer ons.

B.10

Laet der Godloosen boosheyt een eynde worden, ende voordere de rechtueerdighen: ^f want du rechtueerdighe God, proeuest de herten ende nieren.

f 1.Para. 28.a.9. 1.Samu. 16.a.7. Ierem. 11.c.20. ende 17.b.10. ende 20.b.12.

11

Mynen schildt is by God, die den vromen herten helpet.

12

^g God is een recht Richter, ende een God die daghelicx dreycht.

g Deute. 10. Psalm. 9.a.5. Ierem. 11.c.20. 2.Timoth. 4.a.8.

13

Wiltmen hem niet bekeeren, ^h so heeft hy zijn sweerdt ghewettet, ende synen boghe ghespannen, ende ooghet.

h Hesek. 21.b.13.

14

Ende heeft daer op gheleyt doodtlick gheschut: syne pijlen heeft hy toegherichtet te verderuen.

15

Siet, ⁱ die heeft wat quaets in den sin, met ongheluck is hy swangher: hy sal dannoch een faute baren.

i Esaie. 59.a.4. Hiob. 15.d.35.

16

^k Hy heeft eenen kuyl ghegrauen ende wtghebracht, ende is in den kuyl gheuallen, die hy ghemaeckt heeft.

k Esther. 7.a.9. Syrach. 27.c.29. Eccles. 10.a.4. Prouer. 26.c.27. Susan. g.62. Danie. 6.c.24.

17

Sijn ongheluck sal op synen ^l kop komen, ende syne ^m vermetentheydt op synen schedel vallen.

l Psalm. 140.b.10.

m Of, wreuel, of, moetwillighe onbillicheyt

18

Ick dancke den Heere, om syner gherechticheyt wille, ende wil louen den Name des Heeren des Allerhoochsten.