Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den v. Psalm.

1. Een ghebet teghen de valsche Leeraers, met eener merckelicke beschrijuinghe, valscher leere, die de menschen door vertrouwen eyghener verdiensten ouermoedich, ende also seker in sware sonden maket: daer dannoch ten laetsten ghespeuret werdt, dat de consciencien nerghens dan in Gods woordt berusten konnen.

A.1

Eenen Psalm Dauids, voor te singhen, voor het erue.

2

HEere hoort mijn woordt, merct op myne reden.

3

Hebt acht op mijn schreyen, mijn Koninck ende mijn God: want ick wil voor dy bidden.

4

Heere, vroech woudestu mijn stemme hooren, vroech wil ick my tot dy schicken, ende daer op mercken.

5

^a Want du en bist niet een God, dien Godloos wesen behaecht: wie boos is, die en blijft niet voor dy.

a Sapien. 14.a.9. Prouer. 3.d.32.

6

^b† De grootsprekers en bestaen niet voor dynen ooghen, du bist vyandt allen quaetdoenders.

b† And. onsinnighen ofte onuerstandighen

[fol. 179r]

7

^c Du brenghest de leughenaers om: de Heere heeft eenen grouwel aen den bloedtghierighen ende valschen.

c Psalm. 101.a.7.

8

^d Ick daerenteghen wil in dijn huys gaen, op dyne groote goedicheyt, ende aenbidden tegen dynen heylighen Tempel, in dyner vreese.

d Psalm. 138.a.2.

9

Heere, leydt my in dyner gherechticheyt, om myner vyanden wille: richtet dynen wech voor my henen.

B.10

Want in haren monde en is niets ^e ghewis, hare inwendicheyt is hertenleedt, ^f haer kele is een open graf, met haren tonghen ^g huychelen sy.

e Dat is, haer leere maect ijdel onrustige ende onsalige consciencien, dewijle sy ijdele wercken, ende niet Gods genade en prediken.

f Roman. 3.b.13.

g Of, vleyen

11

^h† Beschuldichtse God, dat sy vallen van haren voornemen, stootse wt om harer grooter ouertredinghe wille: want sy zijn dy onghehoorsaem.

h† and. verwoeste

12

Laet hen verblijden alle, die op dy betrouwen, eewichlick laetse roemen: want du beschermestse: vrolick laet zijn in dy, die dynen Naem liefhebben.

13

Want du Heere seghenest de rechtueerdighe, du kroonestse met ghenaden, als met eenen schilde.